Durante priodu kampaña ba prosesu referendum ne’ebé hahú husi loron 14 -27 fulan Agostu tinan 1999, iha insidente barak mak mosu, inklui asasinasaun hasoru ativista pro-independénsia sira, estudantes no lider sira ne’ebé halo kampaña nakloke ba Independensia nian. iha loron ikus kamapaña husi parte Pro-Otonomia nian iha loron 26 fulan agostu, Pro-otonomia sirahalo kampaña bo’ot iha Dili Laran Tomak.
Sira halo atake no sunu edifisiu sira iha Dili laran no hakanek jornalista nain rua no hamate ema nain 8, inklui insidente ne’ebé akontese Kuluhun ne’ebé hamosu konfrontus entre aktivista pro-otonomia ho juventude pro-independénsia sira. Insidente ne’e akontese bainhira grupu pro- otonomia nian liu husi ponte Kuluhun nian, grupu juventude husi pro-independénsia sira komesa tuda ona sira ho fatuk no sona kanek membru ida husi pro-otonomia nian ho naran Marcus.
Hafoin akontesementu konfrontu ne’e iha tuku tolu lokraik membru husi Unidade Polisia Brimob (Brigade Mobile), hahu tiru grupu pro-independénsia sira iha Kuluhun. Insidente tiruteiu ne’e hamate juventude nain 4, inklui Bernadinho Joaquim Afonso Guterres ne’ebé hanesan estudante universitariu ne’ebé estuda iha Universitas Satya Wacana,Salatiga, Indonézia ne’ebé fila mai Timor atu tuir Konsulta Popular ne’ebé sei realiza iha loron 30 fulan Agostu tinan 1999, Membru Brimob sira tiru mate iha estarada besik kurzamentu Kuluhun nian iha loja Virgo nia sorin. Aleinde ne’e iha joventude nain tolu seluk mak Adelino de Jesus da Silva (23), Virgilio da Costa Rodrigues (Azildo) (26) ho Atanazio Moniz de Jesus (Ameta) (23).
