Dili, 16 Jullu 2020 – Centro Nacional Chega!I.P lideradu husi membru Konsellu Administrasaun Pe. Jovito Rêgo de Jesus Araújo no Diretór Ezekutivu Centro Chega! Sr. Hugo Maria Fernandes hala’o enkontru kortejia ho Exelénsia Vise Primeiru-Ministru Sr. José Reis iha Edifisiu Ministériu Ordenamentu Teritoriu Fatuhada Dili.
Objetivu husi enkontru ne´e mak kongratula Exelénsia Vise Primeiru Ministru ba pozisaun ne’ebé nia hetan no atualiza servisu Centro Chega! nian, liu-liu liga ho identifikasaun sitiu istoriku no protesaun sitiu istoriku sira ne’ebé Centro Chega! finaliza ona nia mapaeamentu iha munisípiu 6, ne’ebé iha ligasaun ho Exelénsia Vise Primeiru-Minsitru nia servisu iha área ordenamentu teritoriál.
Iha enkontru ne’e, Exelénsia Vise Primeiru-Ministru apresia tebes ho servisu Centro Chega! nian liu husi programa importante sira hodi kontinua prezerva memória pasadu. Vise PM mós realsa katak ho dadus sítiu istóriku ne’ebé Centro Chega! iha ona, bele tulun tebes servisu iha área ordenamentu teritoriál, liu-liu liga ho protesaun ba sitiu hirak ne’e.
Enkontru ne’e remata ho entrega Livru Relatóriu Chega!, dadus prelimanariu identifikasaun Sítiu Istóriku, Relatóriu Primeiru Mandatu no Relatóriu Anuál 2019.
