Loron 31 Maiu 1976, nu’udar data ne’ebé Governu Provinsia Timor-Timur konvoka asembleia ida hanaran Asembleia Populár ne’ebé xefia husi Guilherme Gonçalves. Timoroan sira husi Partidu APODETI, UDT, KOTA, TRABALHISTA no Reprezentante sira husi Konsellu (Munisípiu) 13 no mós Reprezentante sira husi Reino sira halo Deklarasaun ida husu ba Prezidente Soeharto hodi simu Timor-Timur nu’udar Provínsia ida Indonézia nian. Deklarasaun ne’e halo iha Sporting Clube, Díli.
Hodi relembra fali ba eventu ida ne’e, mak realiza ona diskusaun virtuál istóriku ida iha Sporting Clube, Dili iha loron 31 Maiu 2021 kona-ba “Aktu Determinasaun liu husi integrasaun ba Indonesia”, hodi Komemora tinan 45 aktu orkestrada ida ne’e.
Diretór Ezekutivu Centro Nacional Chega! Sr. Hugo Maria Fernandes, halo mós aprezentasaun iha dikusaun istóriku ida ne’e hodi ko’alia kona-ba CAVR ho nia mandatu no identikasaun sira, estabelesimentu Centro Chega! ho nia mandatu, Konflitu Interna to’o anexasaun Indonézia, eventu iha loron 31 Maiu 1976 to’o unifikasaun, resposta Indonézia ba pedidu integrasaun no rekoñesimentu internasionál, inklui deklarasaun husi autór sira nu’udar Reprezentante Povu Timor-Timur.
Sai mós nu’udar aprezentadór iha diskusaun virtuál ne’e mak Sr. Domingos Oliveira, Sr. Pedro Lebre, Prof. Hamish Mcdonnald, Prof. David Webster no Peter Job. PhD.
Informasaun kompletu kona-ba aprezentasaun Diretor Ezekutivu Centro Chega! Sr. Hugo Maria Fernandes nian bele haree iha ne’e.
