Dili – (08 Janeiru 2024), Centro Nacional Chega!I.P halo avaliasaun no retiru anuál tinan 2023 ho tema “Rekupera, Reforma no Reforsa”. Alende avaliasaun no retiru anuál, Centro Chega! mos halo eleborasaun Planu Operasional (PO), Planu Ezekusaun (PE) no Planu Aprovizionamentu (PA) no mós halo ajustamentu ba orsamentu implementasaun atividade tinan 2024.
Antes hala’o atividade hirak ne’e, Membru Konsellu Administrasaun Centro Nacional Chega!I.P, Reverendo, Arlindo Marçal konvida estrutura no ofisiál tomak halo um minuto de silêncio (minutu ida hakmatek) ba saudozu Sisto dos Santos, Membru Konsellu Administrasaun (KA) Centro Nacional Chega!I.P ne’ebé lahamutuk ona ho Centro Chega! iha tinan 2024.
Ita halo um minuto de silêncio ba saudozu Sisto dos Santos tanba ita konsidera hanesan maun alin ne’ebé ho espiritu hanesan fó kontribuisaun ba Centro Nacional Chega!I.P ne’ebé fila hikas ona ba aman maromak nia kadunan Santo iha dia 17 Marsu 2023.
“Hau hakarak konvida maluk sira atu halo um minuto de silêncio ba ita nia kolega Sisto ne’ebé oras ne’e laiha ona ita nia leet, maibé ita konsidera nia hanesan maun alin ida ho espiritu hanesan. Ita hahú ho um minuto de silêncio hanoin kona-ba ita nia maluk sira ne’ebé oras ne’e lahamutuk ho ita”, dehan Reverendo, Arlindo iha abertura atividade avaliasaun no retiru anual 2023 ne’ebé realia iha Salaun Konferensia Centro Chega!I.P, Antigo Comarca Balide-Dili.
Membru KA esplika, um minuto de silêncio ne’e mos ba maluk sira seluk ne’ebé mak lahamutuk ho ita no fila ona ba mundu seluk.
Saudozu Sisto dos Santos hahú hala’o nia kna’ar nu’udar Membru Konsellu Administrasaun Centro Nacional Chega!I.P iha fulan Jullu 2020, nu’udar reprezentante husi organizasaun sosiedade sivil.
Saudozu Sisto nu’udar ativista direitus umanus Timor-Leste nian ne’ebé mak lakole atu luta no defende direitu ema Timoroan nia hodi hetan justisa. Sisto mak ema ida ne’ebé determinadu tebes iha nia misaun boot hodi halakon injustisa iha Timor-Leste, liu-liu ba Timoroan sira ne’ebé mak marjinalizadu no vulneravel liu.
Nu’udar ativista direitus umanus ida, Sisto hamriik iha fileira oin iha asaun ne’ebé de’it hodi luta no defende soberania Timor-Leste nian no moris kmanek ba Timoroan sira. Saudozu Sisto la’ós de’it halo asaun defende direitu umanu iha Timor-Leste. Sisto sai mos lian Timor-Leste nian ba luta ba ukun rasik-an rai seluk nian, hanesan Palestina, Sahara, Myanmar no mos hatudu nafatin espiritu solidaridade internasional ba nasaun no povu ne’ebé mak opremidu.
Media CNC
