Díli – (16 Maiu 2025), Centro Nacional Chega!I.P parseria ho United Nations Educational, Scientific and Cultural Organization (UNESCO), Ministeriu Edukasaun (ME) no Instituto Nacional de Formação de Docentes e Profissionais da Educação de Timor-Leste (INFORDEPE) estabelese Rede Manorin Istória no Edukasaun ba Dame iha tinan 2022.
Iha tinan 2024, Centro Chega!I.P hamutuk ho parseiru sira organiza workshop ida iha Hotel Timor hodi hametin liu tan Rede Manorin Istória no Edukasaun ba Dame ne’ebé estabelese ona iha munisipiu 12 hanesan, munisipiu Manatuto, Baucau, Lautem, Viqueque, Aileu, Manufahi, Ainaro, Covalima, Bobonaro, Likisa, Ermera no Oekuse-RAEOA (Rejiaun Administrativu Espesial Oekuse Ambeno).
Munisipiu 12 estabelese ona Rede Manorin Istória no Edukasaun ba Dame, maibé Munisipiu Díli to’o ohin loron seidauk estabelese Rede Manorin Istória no Edukasaun ba Dame.
Maske nune’e, Diretór Divizaun Edukasaun no Formasaun (DEF), Alexandre Ornay Pinto, husu ba manorin sira ne’ebé tuir ona formasaun husi Centro Chega!I.P, UNESCO, ME no INFORDEPE kona-ba Istória no Edukasaun ba Dame atu estabelese Rede Manorin iha Munisipiu Díli para atu fasilita komunikasaun no koodenasaun servsiu.
Kestaun ne’e Diretór DEF hato’o iha ámbitu serimonia enseramentu formasaun ba profesor sira ne’ebé realiza durante loron 5 (12-16), iha Salaun INFORDEPE, ho tema “Teacher Training for 3rd Cycle Basic Education and Secondary Education on History Education for Peace in Timor-Leste”, ne’ebé partisipa husi manorin sira hamutuk 47 mai husi munisipiu Dili no Aileu.
“Hau hakarak hato’o mos iha ne’e, tinan kotuk ita inisia estabelese Rede Manorin Istória no Edukasaun ba Dame, iha Díli seidauk iha. Ita iha enkontru tinan kotuk iha Hotel Timor. Karik ida ne’e biban ida mos ba ita boot sira ne’ebé tuir formasaun bele buka malu atu harii Rede Manorin Istória no Edukasaun ba Dame”, Diretór DEF husu Manorin sira ne’ebé tuir formasaun.
To’o agora Centro Chega! ho parseiru sira ne’ebé mak durante ne’e fo formasaun seidauk simu proposta ruma husi Rede Manorin Istória no Edukasaun ba Dame iha munisipiu Díli nian.
Diretór fo hanoin ba Manorin sira katak, Rede Manorin ne’e importante tebes tanba liu husi Rede ne’e manorin sira bele servisu hamutuk, fahe esperensia ba malu kona-ba materia sira ne’ebé aprende durante formasaun hanesan, istória, direitus umanus, paz, metodolojia formasaun sekulu 21 nian.
Seluk fali mak, iha Rede Manorin ne’e bele organiza enkontru regular entre manorin sira. Rede Manorin sira bele organiza estudante sira halo vizita ba sítiu istóriku sira iha munisipiu Díli. Atividade hirak ne’e Rede Manorin organiza iha orsamentu oituan tulu ita boot sira nia atividade refere.
“Ita boot sira bele hakbesik-an ba Centro Chega!I.P tanba Chega! iha materiais didatika balun istória nian, ami iha biblioteka. Ida ne’e karik balun livre bele hakat liu ba Centro Chega!, ba ami nia fatin atu ami bele oferese livrus, filme, fotofrafia hodi fasilita ita boot sira nia prosesu aprendisajen istória”, Diretór sujere.
Media Chega!.
