Centro Nacional Chega!I.P servisu hamutuk ho Asosiasaun Vítima Konflitu Politiku (AVKP) 1974-1999 harii ona Monumentu Memórial Masakre 12 Abríl 1999, iha Suku Meligo, Postu Administrativu Cailaco, Munisípiu Bobonaro. Iha masakre 12 Abríl 1999 ne’e, hamate ema sivil na’in 7 ne’ebé oho husi milisia pro-integrasaun.

Centro Chega! I.P hamutuk Asosiasaun Vítima harii Monumentu Memórial Masakre 12 Abríl 1999 ho fatuk ne’ebé sai karater Timor-Leste nian ne’ebé uza konseitu Sepulture Fatuk (Stone sepulture).

Monumentu Memórial Masakre 12 Abríl 1999 ne’e inagura husi S. E. Sekertariu Estadu Asuntu Kombatentes da Libertasaun Nasionál, Sr. Cesar dos Santos da Silva “Merak”.

Monumentu memórial ne’e sai nu’udar meius ida hodi fo óndra, valoriza no dignifika martires sira ne’ebé mate tanba defende ukun rasik-an. Monumentu memórial ne’e mos sai evidensia ba akontesimentu violasaun direitus umanus ba Timoroan sira iha prosesu luta libertasaun nasionál. Memórial iha fatin istóriku sai objetu/fatin ne’ebé prova kona-ba akontesimentu, no ema bai-bain sira nia esperiénsia, nune’e memória kona-ba sofrimentu ba sira ne’ebé lakon vida iha fatin istóriku, no mos ba rekoñesimentu públiku nian ba vítima sira.

Memórial ne’e harii iha tinan 2024 hodi haktuir planu asaun anual tinan 2024 Centro Chega! I.P nian.

Media Chega!