Dili – (08 Novembru 2024), Diretór Ezekutivu Centro Nacional Chega!I.P, Hugo Maria Fernandes asina Akoru Servisu Hamutuk (ASH) ho Sobrevivente Konflitu Pasadu hamutuk nain 5 atu hetan osan subvensaun publika ba programa apoiu ekonomia sobrevivente nian atu hakbiit liu tan sira nia atividade ekonomia liu-liu negosiu.
Sobreviente nain 5 ne’ebé hetan osan subvensaun publika ba apoiu ekonomia mak hanesan, Etelvina Pinto, iha aldeia Uma Liurai, Suku Uai-Mori, Postu Administrativu Viqueque, Munisipiu Viqueque ho atividade negosiu mak soru tais. Sobrevivente Isabel Martins iha Aldeia Cota-Heu, Suku Ponilala, Postu Admnistrativu Ermera, Munisipiu Ermera ho atividade negosiu mak loke kios, faan dose no suku hena. Sobrevivente Ricardina Francisca Cabral, Aldeia Saua-Cassa, Suku Laisorulai de Baixo, Postu Administrativu Quelicai, Munisipiu Baucau ho atividade negosiu mak Soru Tais. Sobrevivente Virgina dos Anjos, Aldeia Uma Liurai, Suku Uai-Mori, Postu Administrativu Viqueque, Munisipiu Viqueque ho atividade negosiu mak faan sasan kios no faan naan. Sobrevivente Fernanda da Costa Amaral, Aldeia Hareoan, Suku Bibileo, Postu Administrativu Viqueque, Munisipiu Viqueque ho atividade negosiu mak loke kios, halo modo, suku hena no homan lafatik.
Antes asina ASH, Diretór Ezekutivu esplika, “apoiu ida ne’e atu hatudu nafatin governu liu husi Centro Chega!I.P nia komprimisu ba vitima sira. Apoiu ne’e atu hakbiit sira oinsa mak vitima sira bele habelar liu tan inisiativa sira ne’ebé sira la’o tiha ona”.
Alende ne’e, Xefe Suku Laisorolai de Baixo, Postu Administrativu Quelicai, Munisipiu Baucau, Julio Farkus rekoñese, programa apoiu ekonomia ne’ebé Centro Chega! oferese ne’e di’ak tanba bele tulun sobrevivente sira nia atividade ekonomia.
Enkuantu, atividade ne’e realiza iha Salaun Konferensia Centro Chega! Antigu Comarca Balide, Dili no partisipa husi Asosiasaun Chega! ba Ita (ACbIt), Asosiasaun Vitima Konflitu Politika 1974-1999, Asosiasaun Eis Prizoneiru Politika (ASEPPOL) no Autoridade Lokál.
Tuir baze dadus Centro Chega! nian, iha tinan 2017-2024 sobrevivente ne’ebé hetan osan subvensaun publika ba programa apoiu ekonomia hamutuk ema na’in 146 ho grupu 10.
(Media CNC)
