Jakarta, (25 Setembru 2025) – Diretór Ezekutivu Centro Nacional Chega!I.P, Hugo Maria Fernandes ho ekipa kompostu hosi Diretór Divizaun Edukasaun no Formasaun (DEF), Alexandre Hornay Pinto no Matias dos Santos partisipa enkontru rejionál ho tema jerál “Countering hate speech and preventing conflicts towards more peaceful societies through education”.

Objetivu prinsipal hosi enkontru ne’e mak atu esplora estratejia hadia no transforma sistema edukasaun ba prevensaun konflitu, kombate diskursu ódio no forma diskriminasaun oin-oin iha sosiedade hodi kontribui ba  dame, fahe estudu kazu no inisiativa sira ne’ebé sustenta edukasaun ba paz iha Sudeste Aziátiku. Enkontru ne’e organiza hosi UNESCO (United Nations Educational, Scientific and Cultural Organization), ne’ebé hala’o durante loron rua hahu (24 – 25 Setembru 2025), iha Jakarta-Indonezia.

Enkontru rejional ne’e, Diretór Ezekutivu, Hugo Maria Fernandes sai panelista hamutuk ho panelista sira seluk hanesan, Karel Fracapane (UNESCO), Reprezentante Ministériu Edukasaun Juventude no Desportu Kambodia (MEJDK), Kim Peng no Reprezenta Ministériu Edukasaun Thailand (MET), Chalermchai Phanthalert hodi ko’alia ho tema “Strategies for 2026-2030 for transformative education to advance peace in the Region”. Iha sesaun aprezentasaun, Diretór Ezekutivu aprezenta kona-ba “Timor – Leste: History Education as Tool of Transitional Justice”. Iha aprezentasaun ne’e, Diretór destaka importansia hosi enkontru rejional ne’e no  subliña servisu Centro Chega!I.P nian ligadu ba implementasaun rekomendasaun sira hosi relatóriu Chega! no PMAS liu-liu ba asuntu edukasaun, prezervasaun memória pasadu, rekonsiliasaun no Justisa Tranzitóriu.

Enkontru ne’e partisipa hosi entidade oin-oin liu-liu instituisaun sira ne’ebé servisu ba dame no rekonsiliasaun, Organizasaun Internasional no Rejional, Parseiru Dezenvolvimentu, Embaxada sira hosi ASEAN (the Association of Southeast Asian Nations), SEAMEO (Southeast Asian Ministers of Education Organization), Sosiedade Civil, Akademiku, Peskizadór no Peritu sira.

Delegasaun sira hosi Timor-Leste mai hosi Ministeriu Edukasaun liu hosi Diresaun Nacional Kurikular, INFORDEPE, g7+ no Univesidade Nacional Timor Lorosa’e (UNTL).

Entertantu enkontru regional ne’e realiza tanba hetan apoiu hosi KOICA no Asia-Pasific Centre of Education for International Understanding (APCEIU).

Media Chega!.