Dili – Ekipa husi Centro Nacional Chega!I.P no Ministériu Justisa ne’ebé envolve Diretór Jerál no Diretór Nasionál sira halo ona enkontru iha loron 29 Jullu 2021 liu ba, hodi deskute kona-ba ajustamentu planu servisu konjunta ne’ebé haktuir iha Nota Entendimentu Kooperasaun, iha Planu Asaun Anuál tinan 2022.
Asuntu importante ida ne’ebé diskute iha Enkontru entre autoridade altu Centro Chega! no Ministériu Justisa ne’ebé hala’o iha Salaun Enkontru Ministériu Justisa Caicoli Dili mak Ratifikasaun Konvensaun Ema Lakon.
Diretór Divizaun Relasaun Esterna, Komunikasaun no Advokasia (DREKA) Centro Chega! Sr. Gaudencio Soares Souza sujere ba Ministériu Justisa (MJ) atu integra asuntu ratifikasaun konvensaun ema lakon iha Planu Anuál 2022.
“Hau haree iha Nota Entendimentu ne’e, sita mos kona-ba ratifikasaun konvensaun ema lakon. Ami hanoin Ministériu Justisa dalan ida ne’ebé mak ita deskute, bele karik tau iha planu. Se tau iha planu karik tinan oin esforsu boot ida para estadu Timor-Leste bele ratifika konvensaun ema lakon”, dehan Sr. Gaudencio bainhira hala’o enkontru ho Diretór Jerál no Nasionál sira, iha Salaun Enkontru MJ, Caicoli-Dili.
Centro Chega! ba dadaun ne’e esforsu no halo hela advokasia ba Ratifikasaun Konvensaun Ema Lakon, liu husi halo enkontru ho Ministru Justisa no Parlamentu Nasional husi Bankada Parlamentár sira hanesan FRETILIN, PLP, UDT, no Frente Mudansa.
Tuir Sr. Gaudencio, Ratifikasaun Konvensaun Ema Lakon, nu’udar Rekomendasaun husi Relatóriu Chega! no PMAS, ne’ebé ejize ba estadu rua (Indonézia no Timor-Leste) harii komisaun buka ema lakon.
Hatan ba esplikasaun ne’e, Diretora Jerál Ministériu Justisa (MJ) Sra. Marcelina rekoñese katak, Konvensaun ema lakon estadu Timor-Leste loos duni seidauk ratifika, nune’e Ministériu Justisa konsidera asuntu ne’e importante tebes atu tau iha planu, maibé tenke hato’o mos ba Ministériu Negosiu Estranjeiru no Kooperasaun (MNEK) no Ministériu Solidariedade Sosiál no Inkluzaun (MSSI) atu bele servisu hamutuk no hato’o ba Parlamentu Nasional atu Ratifika Kovensaun Ema Lakon.
Partisipa iha enkontru ne’e, Diretór Ezekutivu Interinu Centro Nacional Chega!I.P Sr. Metodio Caetano Moniz, Diretór Divizaun Relasaun Externa Komunikasaun no Advokasia (DREKA) Sr. Gaudencio Soares Souza, Diretór Divizaun Edukasaun no Formasaun (DEF) Sr. Vicente Borges Maia, Diretór Divizaun Solidariedade Sosial (DSS), Sr. Nelson Seixas no Xefe Departementu Divizaun Peskiza Arkivu Istóriku (DPAI), Sr. Aventino de J. B. Ximenes.
