Dili – iha loron 28 Jullu 2021, Ekipa husi Centro Nacional Chega! ne’ebé lidera husi Diretór Divizaun Relasaun Esterna, Komunikasaun no Advokasia Sr. Gaudencio Soares Souza halo enkontru ho Xefe Operasaionál g7+ Dr. Felix Piedade hodi halo koordenasaun no integrasaun Nota Entendimentu ba Planu Asaun Anual 2022.
Iha enkontru ne’e, Xefe Operasaionál g7+ Dr. Felix Piedade hato’o komprimisu katak, ba futuru Centro Nacional Chega!I.P no Organizasaun g7+ hakarak join programa “peace and reconciliation” tanba programa ne’e di’ak ba Timor-Leste.
Tuir Dr. Felix, Programa “peace and reconciliation” ne’e hanesan planu ida oinsá mak atu internasionaliza Relatóriu Chega! liu husi fahe esperiénsia. Alende ne’e halo konferensia no mos Talk Show sira iha televizaun ho topiku oin-oin uza lingua Ingles hodi fahe ba nasaun sira iha mundu liu-liu nasaun membru g7+.
“Ba futuru ita join kona-ba Peace And Reconciliation entre g7+ no Centro Chega! ida ne’e hanesan planu ida ke ita halo, depois situasaun la’o di’ak”, dehan Dr. Felix iha Sala Enkontru g7+, Dili.
Nia informa, g7+ nia planu prioridade 2021 mak hanesan kontinua fahe esperiénsia Timor-Leste nia rekonsiliasaun ba nasaun membru G7+ hanesan Afeganistaun, Sudaun Súl no Iamen.
Enkuantu, Diretór Divizaun Relasaun Esterna, Komunikasaun no Advokasia Sr. Gaudencio Soares Souza agradese ba organizasaun g7+ nia apoiu kooperasaun hodi halo ajustamentu ba planu servisu ne’ebé liga ho konferénsia internasionál sira no mos fahe esperiénsia ba membru organizasaun g7+ sira iha rai liur.
g7+ nu’udar parseiru estratéjiku Centro Chega! nian tanba ne’e liu husi enkontru ne’ebé hala’o, bele esplora kooperasaun di’ak liu tan iha futuru no mos oinsá atu hamosu programa sira hodi bele servisu hamutuk diak liu tan.
