Dili – Organizasaun Sosiedade Sivíl Asia Justice And Rights (AJAR) fó graduasaun ba graduadu sira husi eskola ativista direitus umanus no justisa sosiál ba klase intermediáriu, klase báziku 2020 no klase báziku 2021 ho ema hamutuk na’in 221.
Tema serimonia graduasaun mak: “Fini Ba Futuru Lideransa Nasaun Ne’ebé Demokrátiku no Umanizmu”.
Iha intervensaun, Diretór Ezekutivu Centro Nacional Chega!I.P, Hugo Maria Fernande konsidera eskola ativista direitus umanus no justisa sosiál hanesan pasu inisiu, maibé importante tanba eskola ne’e prepara joven sai ativista ne’ebé brani ko’alia no defende direitus umanus.
“Direitus umanus hanesan naroman ida tanba ne’e labele lakon konfiansa no esperansa maske ho kompleksidade natureza dezenvolvimentu”, dehan Hugo iha diskursu serimonia graduasaun ne’ebé realiza iha salaun Canossiana Becora, Dili, Sexta-feira (18/02/2022).
Asuntu direitus umanus ita tenke kontextualiza-an tuir mudansa dezenvolvimentu nian tanba tempu uluk no agora lahanesan. Iha tempu uluk ita ko’alia kona-ba asuntu direitus umanus, ita ko’alia kona-ba defende auto determinasaun. Iha tempu agora, iha pos-konflitu ita ko’alia kona-ba justisa tranzitoriu, igualidade jenéru no seluk tan.
Tan ne’e, nia husu ba joven no estudante sira ne’ebé eskola direitus umanus tenke kontinua aprende no atualiza nia-an ho situasaun ne’ebé mak ita hasoru tanba asuntus direitus umanus ne’e kompleksu no nesesita pensamentu ne’ebé klean iha prosesu dezenvolvimentu nasionál.
Enkuantu, Diretór Asia Justice And Rights (AJAR), José Luis Oliveira informa, objetivu prinsipál husi eskola ne’e mak prepara joven no estudante sira atu sai futuru lideransa ne’ebé demokrátiku no umanizmu ho kultura demokrátiku no umanizmu.
Tanba eskola ne’e, estabelese atu forma estudante no joven sira atu kompriende situasaun reál no mos aprende istória Timor-Leste nian atu forma sira sai ema ne’ebé hadomi patria no presta servisu (patriota) ida ne’ebé promove paz.
Reprezentante Estudante Graduadu, Etna da Cunha lori estudante graduadu nia naran hato’o agradese barak ba AJAR tanba loke ona eskola ativista direitus umanus no forma ona sira sai futuru ativista ne’ebé brani ko’alia kona-ba asuntu direitus umanus no igualidade jenéru agora no ba futuru.
Media Chega!
