Dili-Diretór Ezekutivu Centro Nacional Chega!I.P Hugo Maria Fernandes husu ba jornalista sira atu halo produsaun no públikasaun notísia kona-ba memória pasadu ba kategória feature ka dokumentáriu ba ema nia istória pesoál ne’ebé fó nia kontribuisaun ba luta ukun rasik-an.
Tanba ida ne’e nu’udar mekanizmu ida atu prezerva memória pasadu liu hosi kna’ar jornalista sira nian no sira iha dever atu hakonu públiku nia direitu ba informasaun.
“Se ita halo ida ne’e hanesan dever ida atu fó hatene saida mak akontese. Ita boot entrevista tiu ida konta istória, ita boot sira halo produsaun memória pasadu, bainhira públika ita hakonu ona ema nia direitus atu hatene sá mak akontese uluk”, dehan Hugo bainhira sai oradór ba kolókiu públiku ba jornalista estajiáriu sira ho tema “Papel Media hodi Prezerva Memória Pasadu”, ne’ebé realiza iha Edifisiu Conselho Impnresa, Quintal Boot, Dili, Segunda-feira (14/02/2022).
Hakonu públiku nia direitu ba informasaun, ne’e nu’udar mekanizmu ida ita bolu justisa tranzitóriu kona-ba direitus atu hatene. Klaru ita labele halo kobertura ba ema hotu-hotu, maibé ita tenke komesa ona halo kobertura no públika sira nia informasaun ba públiku atu bele hatene.
Justisa tranzitóriu seluk mak direitu ba reparasaun ka kompensasaun. Ba direitu ida ne’e, jornalista sira tenke iha sensibilidade umana hodi hato’o informasaun kona-ba polítika reparasaun ne’ebé estadu halo ba nia sidadaun sira. Ezemplu polítika osan ba veteranus sira, bolsa da mãe, bolsu estudu ba veteranus nia oan sira. Ne’e maneira reparasaun. Maibé dalaruma reparasaun ne’e hamosu diskriminasaun.
“Entaun ita nia kna’ar ida oinsá revela (hatudu) faktu sira. Halo análiza ba polítika reparasaun ne’ebé mak agora la’o i aprezenta dadus. Hanesan Sra. ida iha oan nain 5 husi laen nain lima nia oan. Nia sai tiha escravidão sexual (gudang seks) ba militar sira. Ema nunka rekoñese partisipa funu”, Hugo informa.
Iha sorin seluk, Jornalista Estajiaria Jacinta Gonçalves konsidera, informasaun ne’ebé Centro Chega! fahe importante tebes, hanesan motivasaun di’ak ida oinsá atu motiva nafatin jornalista sira bele halo produsaun ba memória pasadu liu-liu buka vitima sira ne’ebé partisipa iha funu.
Maibé hakarak rekomenda mos ba Centro Chega! karik atu buka tuir vitima sira, bele konvida jornalista hodi halo kobertura. “Karik ba oin CNC rekolla memória hirak ne’e konvida mos jornalista sira halo kobertura ba ema kiik sira ne’ebé mak fó sira nia kontribuisaun iha independensia”.
Nia hatutan, jornalista sira agora ladun buka informasaun kona-ba memória pasadu tanba jornalista sira seidauk komprende oinsá atu halo produsaun ba memória pasadu. Entaun ho esplikasaun ne’e, bele ajuda jornalista sira ba oin bele halo produsaun ba memória pasadu.
Media Chega!
