Dili – Iha loron Tersa-feira, 10 Maiu 2022, Centro Nacional Chega!I.P liuhosi Diretór Divizaun Relasaun Externa Komunikasaun no Advokasia (DREKA), Gaudencio Soares Souza ho ekipa halo enkontru ho Prezidente KRAM (Komisaun Reguladora Arte Marsiais), Octavio da Conceição ne’ebé akompaña hosi Konselleru, Inocencio Magno da Silva no Komisariu, Heribertos A. Colo.
Objetivu enkontru ne’e, ko’alia kona-ba atualizasaun servisu Centro Chega! liga ho rekomendasaun Chega! ba KRAM liu-liu promósaun paz no estabilidade hodi asegura dezenvolvimentu mak oras ne’e la’o iha rai laran nomós explora posibilidade ba kooperasaun liuhosi nota entendementu iha área prevensaun konflitu no Kampanã Dame “Peace Campaign” iha Timor-Leste (TL).
Diretór Divizaun Relasaun Externa Komunikasaun no Advokasia (DREKA), Gaudencio Soares Souza informa, Centro Nacional Chega! I.P (Centro Chega!) nu’udar Instituisaun Públika ida ne’ebé estabelese ho Dekretu Lei no. 48/2016 no tutela direitamente ba Primeiru Ministru. Centro Chega! nia vizaun mak: “Sosiedade ida ne’ebé inkluzivu, la repete istória passadu nian, moris iha dame, no respeitu ba direitus umanu”.
Bazeia ba knar hirak ne’e, mak Centro Chega! hakarak servisu hamutuk ho KRAM iha área prevensaun konflitu no Kampanã Dame “Peace Campaign”. Objetivu atu halo prevensaun konflitu no promósaun ba paz no estabilidade hodi asegura dezenvolvimentu ne’ebé mak la’o iha rai laran.
“Ami hakarak koopera ho KRAM atu organiza dialógu komunitáriu ba prevensaun konflitu inklui mós halo Peace Campaign ka Kampaña Dame ba área sira ne’ebé mak sai hanesan potensia ba konflitu. Tanba iha rekomendasaun Centro Chega! hateten katak arte sira ne’ebé mak iha, ita tenke uza sira nia potensia ba hari’i dame para povu moris seguru”, dehan Gaudencio iha edifisiu KRAM, Lecidere-Dili.
Nia haktuir, iha fulan kotuk Centro Chega! halo ona enkontru ho Rede Nasionál Prevensaun Konflitu (RNPK) kompostu Centro Chega!, g7+, NGO Belun, DNPKK no sira seluk tan. Rede ne’e iha Ministeriu Interior (MI) nia okos. Pontu asaun mak Rede halo mak dialógu prevensaun konflitu ho objetivu atu hamenus konflitu iha nivél komunidade.
Prezidente KRAM (Komisaun Reguladora Arte Marsiais), Octavio da Conceição louva servisu Centro Chega! nian durante tinan lima no konsege hamosu mudansa balun.
Preziedenta KRAM mós apresia ba intensaun centro Chega! ne’ebé hakarak koopera ho KRAM iha área prevensaun konflitu no Kampanã Dame “Peace Campaign” iha Timor-Leste. Nune’e, nia akresenta prontu servisu hamutuk ho sekuénsia sira hanesan, enkontru regular ho Rede prevensaun konflitu, dezenu planu hamutuk ba atividade no implementasaun atividade.
Hafoin termina enkontru, Diretór Divizaun entrega relatóriu Chega! no PMAS ba Prezidente KRAM nu’udar simbolu ba estabelesimentu kooperasaun no kontribui ba implementasaun rekomendasaun Chega! PMAS iha servisu fatin.
Media Chega!
