Dili – (Kinta-feira, 26 Maiu 2022), Centro Nacional Chega!I.P lidera hosi Diretór Ezekutivu, Hugo Maria Fernandes ho ekipa asina nota entendimentu ka Memorandum of Understanding (MoU) ho Diretora Ezekutivu Organizasaun Sosiedade Sivil Empreza Di’ak, Joana da Costa Gusmão objetivu atu fó formasaun kona-ba hakbi’it ekonomia Grupu Sobrevivente.
Diretór Ezekutivu Centro Chega!, Hugo Maria Fernandes informa, Centro Chega! asina nota entendimentu ho Organizasaun Sosiedade Sivil Empreza Di’ak ho durasaun tinan 2 tanba atu fasilita formasaun kona-ba hakbi’it ekonomia ba Grupu Sobrevivente hodi hasa’e koñesimentu.
Grupu sobrevivente ne’ebé mak Centro Chega! identifika no fó ona apoiu finanseiru ba sira mak iha direitu tuir formasaun. “Ohin selebra nota entendementu ida ho Organizasaun Sosiedade Sivil Empreza Di’ak ne’ebé iha esperensia mais tinan lima ona, halo akompañamentu ba grupu negosiu sira ne’ebé mak iha Timor kuaze 200 mil ital”.
Alende formasaun, Empreza Di’ak mós sei halo akompañamentu ba iha atividade rutina Gupu Sobrevivente sira nian tanba grupu sira balun loke kios balun servisu iha seitor agrukultura no pekuaria.
Intensaun seluk hosi formasaun ne’e, atu hasa’e koñesimentu hodi sir abele moris rasik, labele depende de’it ba ema seluk no governu maibé sira iha abilidade oinsa dezenvolve rasik grupu ne’e ho di’ak no la’o ba oin
Diretora Ezekutivu Empreza Di’ak, Joana da Costa Gusmão sente orgullu tebes tanba bele asina nota entendimentu ho Centro Chega! hodi servisu hamutuk fó formasaun ba Grupu Sobrevivente sira hodi bele hakbiit ekonomia.
“Ami espera katak ho kolaborasaun ne’ebé ita halo la’os tempu badak de’it maibé ami fiar ba tempu naruk. Ita nia apoiu ba sobrevivente sira ne’e, atu bele hadia sira nia moris liuhosi atividade. Ami nia empreza di’ak hahú iha tinan 2010. Ami halo servisu ba área ida ne’e. Ami fiar katak ho esperensia ne’ebé iha, parte rua bele kolabora hamutuk hodi ajuda sobrevivente sira hodi bele hetan moris di’ak”, Diretora garante.
Tanba formasaun ne’ebé Empreza Di’ak sei fó ne’e, foka liu ba parte negosiu nian liu-liu kona-ba Marketing no akuntabilidade nian. Ami fiar katak ami bele ajuda sobrevivente sira tanba sira hetan formasaun sei lala’o mesak ami sei akompaña nafatin to’o remata.
Enkuantu, Centro Chega! ho Empreza Di’ak asina nota entendimentu ida ne’e kona-ba formasaun negosiu liliu dezenvolve no hakbi’it ekonomia sobrevivente vulneravel sira nia hodi hola parte suporta no hametin ekonomia nasional ne’ebe haktuir no adopta rekomendasaun Chega! no Per Memoriam Ad Spem! relasiona ho knár Solidariedade ba Sobrevivente vulneravel.
Media Chega!
