Dili-Centro Nacional Chega!I.P hamutuk ho organizasaun g7+, Diresaun Nacional Prevensaun Konflitu Komunitariu (DNPKK) no mos Organizasaun Naun Governamental Belun halo ona enkontru hamutuk no konkorda atu reativa fila fali Rede Nasionál Prevensaun Konflitu komunitária (RNPK) ne’ebé uluk iha Diresaun Nasional Prevensaun Konflitu Komunitariu (DNPKK), iha Ministériu Interiór nia mahan.
Diretór Nasionál Prevensaun Konflitu Komunitaria (DNPKK) Antonio Viegas informa, objetivu husi enkontru mak atu reativa fila fali RNPKK no hamutuk hodi halo prevensaun konflitu komunitária.
“Agora ita iha situasaun ida konflitu arte marsiais. Ita mos rekoñese katak ita iha tempu besik kampaña partidu politiku, envolvimentu arte marsiais iha partidu politik”, dehan Diretór iha enkontru kooperasaun entre Centro Chega!, g7+ no Belun iha sala enkontru Ministeriu Interior, Caicoli-Dili, Segunda-feira (14/02/2022).
Razaun prinsipal ba reativa rede nasionál prevensaun konflitu tanba hakarak halibur instituisaun governu, sosiedade sivil no organizasaun arte marsias sira atu hamutuk hodi hala’o atividade prevensaun konflitu liu husi diseminasaun informasaun, diálogu, eventu nahe biti boot no rekonsiliasaun.
Diretór Ezekutivu NGO Belun, Luis da Costa Ximenes dehan, reativa rede nasionál prevensaun konflitu ne’e di’ak tebes atu ita hametin servisu hamutuk hodi halo prevensaun konflitu iha komunidade nia leet.
Enkuantu, Diretór Divizaun Relasaun Externa Komunikasaun, Advokasia (DREKA), Gaudencio Soares Souza informa, Rede Nasionál Prevensaun Konflitu Komunitáriu (RNPKK) hanesan instrumentu ida atu halibur entidade hotu-hotu hodi fó hanoin ba malu, kria planu no asaun hodi implementa atividade.
Nune’e mos, Xefe Operasional g7+, Felix Piedade reforsa, reativa rede nasionál prevensaun konflitu ne’e importante. Iha tinan ida ne’e g7+ sei halo atividade desportu ba paz tanba durante tinan rua hala’o atividade sosializasaun lubuk ida, maibé partisipasaun joventude menus.
“Entaun ami hanoin halo atividade desportu ba paz no identifika suku sira saida mak joven sira gosta tebe bola ga basket, depois mak ita enkaixa iha tabela. Tinan ida ne’e ami tarjetu suku tolu iha munisipiu Dili mak suku Comoro, Madohi ho Bebonuk”, dehan nia.
Media Chega!
