Dili – Centro Nacional Chega!I.P liu husi Divizaun Dezenvolvimentu Institusionál no Rekursu Umanus (DDIRU) organiza Formasaun kona-ba Jestaun Organizasaun durante loron 5 ba Funsionáriu Centro Chega! ne’ebé komesa ona husi loron 21 Juñu 2021 no sei termina iha loron 25 Juñu 2021. Fasilitadór ba Formasaun ne’e mak Sr. Metodio Caetano Moniz no formasaun ne’e hala’o iha Salaun Konferénsia Centro Chega!, Antigo Comarca Balide – Dilli.
Diretór Centro Nacional Chega!I.P, Sr. Hugo Maria Fernandes iha abertura foramsaun hateten, esensia husi formasaun ne’e mak, oinsá funsionáriu sira bele hatene halo servisu iha organizasaun ida nia laran no mos oinsá uza instrumentu organizasaun nian hodi halo servisu, Atu nune’e bele mantein nia ritmu katak mudansa sira akontese labele lori ba kotuk, maibé mudansa ne’e tenke evolui no tenke ba oin.
“Hau hanoin espetativa mak balun hakarak aprende, balun hakarak liu aplika, espera katak loron 5 bele sai util ba formasaun ida ne’e”, dehan Hugo Fernandes.
Diretór Centro Chega! mos enkoraza katak, partisipante sira tenke partisipa ho didi’ak maske hatene iha servisu barak seluk, maibé espera katak formasaun ida ne’e bele la’o diak.
