Ainaro – Centro Nacional Chega!I.P liuhusi Divizaun Relasaun Externa, Komunikasaun no Advokasia (DREKA) servisu hamutuk ho Juventude Suku Nunu-mogue, Postu Administrativu Hatubuiliku, Munisipiu Ainaro realiza semináriu hodi komemora loron konsulta popular 30 Agustu ba dala-23.
Ho prezensa Centro Chega! iha Suku Nunu-mogue, Adjunto Administradór Munisipiu Ainaro Jose de Araujo konsidera, prezensa Centro Chega! importante tebes tanba bele fahe infórmasaun kona-ba “papél Centro Nacional Chega! ba implementasaun rekomendasaun sira husi relatóriu Chega! no CVA” ne’ebé liga ba istória pasadu ba komunidade sira.
Adjuntu infórma, komemorasaun loron konsulta popular 30 Agustu ba dala-23 ne’e importante tebes ba Timoroan tomak hodi komemora tanba loron ida ne’e mak deside timoroan sira nian futuru.
Liuhusi seminariu iha ambitu komemorasaun loron konsulta popular, importante tebes tanba hametin espiritu nasionalizmu joven sira nian. Joven sira agora dadaun ninia espiritu nasionalizmu komesa mihis ba dadauk. Entaun liuhusi semináriu ne’e atu bele fanu no kuda fali espiritu nasionalizmu oinsá mak hadomi rai ida ne’e.
Hadomi rai ida ne’e liuhusi joven sira nia kontribuisaun paz tanba iha paz mak dezenvolvimentu bele la’o ba oin. Ita nia prinsipiu luta uluk mak liberta patria no liberta povu. Patria ita liberta ona, maibé povu ita seidauk liberta. Entaun presiza ema hotu involvimentu.
“Ohin Centro Chega! nia prezensa iha ne’e importante tebtebes ba ami Ainarooan liu-liu suku ida ne’e. Fahe infórmasaun kona-ba istória pasadu luta ba ukun rasik-an. Presiza fó hanoin ba joven sira oinsá mak bele iha espiritu nasionalizmu, oinsá mak kontribui ba dezenvolvimentu nasional”, dehan adjuntu Administradór ba Media Chega! iha suku Nunu-mogue, Domingo (29/08/2022).
Nia dehan, Isória ne’e importane, laiha istória ita laba oin. Ita haree ba kotuk haree istória ne’ebé akontese iha pasadu hodi sai lisaun ba joven sira aprende. No hateke ba oin hodi dezenvolve Timor-Leste.
Joven mak nu’udar jerasaun kontinuadór tenke hatene istória. Kuandu lahatene istória luta ba liberta rai ida ne’e ita la’o namlele hela. Istória mak baze fundamental ida oinsá mak atu bele kontribui ba dezenvolvimentu. Istória mak baze fundamental ida oinsá mak kaer metin independénsia no kaer metin kuda tali hodi avansa ba oin.
Xefe Departementu DREKA, Viriato Pereira Soares lori Centro Chega! nia naran hato’o agradesementu ba juventude no estudante sira iha suku Nunu-mogue tanba servisu hamutuk ona ho Centro Chega! hodi realiza semináriu ida ne’e.
Nia haktuir, Centro Chega! nia prenza iha suku Nunu-mogue atu desimina informasaun kona-ba “papél Centro Nacional Chega! ba implementasaun rekomendasaun sira husi relatóriu Chega! no CVA” ne’ebé liga ba istória pasadu.
Viriato argumenta, semináriu ida ne’e realiza iha ambitu komemorasaun loron konsulta popular ba dala-23. Ida ne’e momentu ida importante konvida ita hotu halo refleksaun kona-ba akontesimentu pasadu.
Ohin loron Timor-Leste hetan ona ukun rasik-an ba inan aman sira ne’eb’e uluk kontribui ba iha luta libertasaun patria ida ne’e hakerek imi nia istória hodi rai hela ba jerasaun foun sira aprende hod labele repete-tán istória moruk pasadu
Prezidente Komisaun Organizadór, Mouzinho de Souza Amaral esplika, Objetivu husi semináriu ida ne’e mak oinsa mak atu divulga informasaun ba komunidade liu-liu ba joven no estudante sira kona-ba istória pasadu. Joven no estudante barak mak oras ne’e lahatene istória.
Ho informasaun ne’eb’e mak Centro Chega! fahe kona-ba istória pasadu bele aumenta sira nia koñesimentu hodi hametin espiritu nasionalizmu no patriotizmu no kontribui ba prosesu dezenvolvimentu nasional.
Media Chega!
