(Díli, 21 Maiu 2026) – Centro Nacional Chega!.I.P organiza atividade Festival Litersia ho tema “Preserva Memória, Estimula Kultura Lee no Promove Kreatividade Produtiva”, ne’ebé realiza durante loron 3 hahu iha loron (21-23), iha Antigo Comarca Balide.

Objetivu husi atividade Festival Literasia ne’e mak atu promove no fortalese literasia liu husi atividade edukativu sira ne’ebé halo ema iha interese atu le’e, hakerek no halo kreatividade ba memória pasadu ne’ebé asesivel ba ema hotu.

Objetivu seluk mak atu hasa’e koñesimentu ema nian ba memória pasadu. Habelar no motiva ábitu le’e ba timoroan (labarik, joven no ema bo’ot). Atu valoriza eskritór timoroan ne’ebé hakerek ona memória pasadu. Dezenvolve kapasidade le’e, hakerek no ko’alia ho di’ak. Promove biblioteka no espasu le’e seluk hanesan sentru aprendizajen. Hasa’e konsiénsia kona-ba kultura no istória Timor-Leste. Inspira joventude no akademiku sira atu sai eskritór iha futuru inklui promove le’e no literatura ba foinsa’e sira.

Festival Literasia ne’e hala’o hodi fo énfaze ba Memória Pasadu mak inisiativa estratéjika ida ne’ebė uza leitura. diskusaun no espozisaun kultural atu promove kompriensaun istória, Direitus Umanus no identidade kolektiva. Alende ne’e, Festival Literasia mos atu komemora loron mundial literasia nian.

Festival Literasia ho atividade sira hanesan tuir mai ne’e, Diskusaun Tematiku, Diskusaun Livru, Workshop, Live Painting, Arte ba labarik, Konta ai-knanoik, Deklamasaun Poezia, Feira do livru no Chega! Tour!.

Oportunidade hanesan, Centro Chega!I.P mos hala’o atividade Night Market “Espaço de Convivio” ho objetivu mak nu’udar espasu seguru no inkluzivu ba sobrevivente no foinsa’e sira hodi halo interasaun, fahe história no esperiensia, no promove solidariedade através abordajen kriativas no ekonomia komunitária, ho intensaun no foku ba, proporsiona plataforma ba sobreviventes hodi expresa sira nia memória, no esperiensia moris. Promove kriatividade produtivas sobrevivente no foinsa’e sira ba insentiva independensia ekonómika através venda produtu no servisu sira. Sensibiliza foinsa’e kona-ba memória istoriku iha direitus umanus ho forma informal. Konstrui rede solidariedade entre sobrevivente ho foinsa’e sira, no mos hatutan diretamente foinsa’e sira ho kestaun justisa sosial.

Festival Litersia no atividade Night Market “Espaço de Convivio” sei anima husi artista lokal sira mak hanesan tuir mai ne’e, iha loron dahuluk anima husi artista sira mak hanesan, Izu, Lafaek Mutin, Cleopatra. Loron daruak mak hanesan, Malena, Inside The Pressure, KHABALLA, LAFAHEK COLORS. Loron datoluk mak hanesan, Mely Galaxy, Vircoustic, Manu Mata no Klamar.

Centro Chega!I.P hala’o atividade hirak ne’e bazeia ba dekretu-Lei nº 48/2016, ho vizaun atu harii Sosiedade ida ne’ebé mak inklusivu, la repete istória pasadu nian, moris iha dame, no respeitu dereitus umanus. Centro Chega! nia misaun mak atu harii Centru póz-konflitu ne’ebé prezerva memória pasadu nian hodi promove direitu no valór umanu no harii parseria nasionál no internasionál hodi reforsa rede servisu sira atu implementa rekomendasaun sira husi Relatóriu Finál Comissão de Acolhimento, Verdade e Reconciliação (CAVR)- Chega! no Per Memoriam Ad Spem (PMAS) husi Comissão da Verdade e Amizade (CVA), sira ne’ebé relevante.

Detallu informasaun download docpdf:Komunikadu-Imprensa FesLiter