Dili – (25 Fevereiru 2026), Diretór Ezekutivu Centro Nacional Chega!I.P, Hugo Maria Fernandes ho Prezidente Klibur Sobrevivente Feto PIRILAMPU, Maria Isabel Jesus da Silva asina Akordu Servisu Hamutuk (ASH) ho objetivu atu promove implementa rekomendasaun sira hosi Relatóriu Comissão de Acolhimento, Verdade e Reconciliação (CAVR) no mos Relatóriu Per Memoriam Ad Spem (PMAS) relasiona ho institusionalizasaun memoria no promosaun direitus umanus atraves edukasaun, formasaun, Pesquiza no solidariedade ba sobreviventes vulneravel liu husi violasaun direitu umanu no mos promove rekomendasoens komuns CAVR no PMAS kona-ba konstrusaun sentru nasional memoria, pesquiza no aprendizajen.
Objetivu seluk mak atu apoiu tekniku oinsa mak integra programa sira Centro Chega!I.P nian ba iha atividade PIRILAMPU nian tanba atividade sira iha ligasaun direita ho vitima sira. No apoiu finanseiru atu finansia atividade organizasaun nian.
Diretór Ezekutivu Centro Nacional Chega!I.P, Hugo Maria Fernandes hateten, Centro Chega!I.P asina ASH ho PIRILAMPU hodi apoiu fundu hamutuk Dólar Amerikanu Rihun sanulu resin hitu, atus tolu lima nulu (USD 17,350.00) hodi apoiu ba programa no atividade sira PIRILAMPU nian durante tinan ida.
Razaun fundamental Centro Chega!I.P apoiu PIRILAMPU tanba sira iha ligasaun direita ho vitima sira oinsa mak halo servisu koodenasaun no komunikasaun ho vitima sira iha tereinu atu bele fo atendementu ba sira.
“Servisu sira halo iha terreñu tenke iha koodenasaun ba malu atu asegura katak apoiu sira ne’ebé mak estadu fo liu husi orsamentu estadu ne’e to’o duni vitima sira”, dehan Diretór iha serimonia asina ASH ne’ebé hala’o iha Muzeu Chega! Antigo Comarca Balide.
Diretór mos husu PIRILAMPU atu labele haree Asosiasaun Vitima Konflitu Politiku Pasadu 1974-1999 no Asosiasaun Eis Prizoneiru Politiku (ASSEPPOL) hanesan kompetisaun ida maibé nu’udar parseiru ida ne’ebé servisu hamutuk sai forsa. No mos atu foku servisu ba ninia programa no atividade sira atu nune’e labele mosu dezentendementu.
Iha oportunidade ne’e, Prezidente Klibur Sobrevivente Feto PIRILAMPU, Maria Isabel Jesus da Silva, agradese ba Chega! ho nia laran luak ne’ebé fo apoiu fundu ba PIRILAMPU nia programa no atividade sira. Apoiu ne’e hanesan motivasaun ida para oinsa PIRILAMPU bele hamrik hodi la’o ho objetivu ida luta ba reparasaun.
“Ami agradese ho apoiu tomak ne’ebé mak iha atu nune’e tulun ami hakat alkansa ami nia objetivu hakarak luta hetan lei reparasaun husi estadu no governu nian, ami nia kontribuisaun liu-liu ba vitima violasaun pasadu tanba ne’e mak ami harii PIRILAMPU”, dehan Prezidente PIRILAMPU.
PIRILAMPU hanesan organizasaun sosiedade sivil ne’ebé harii ho misaun prinsipál tolu mak hanesan hakarak lolo-liman ba feto vítima ka sobrevivente seksual sira, hodi tulun sira asesu ba asisténsia sosiál, legál no ekonomia. Hakarak hakbiit ka empodera feto vítima ba tortura seksuál sira iha tempu pasadu, tantu psikolójika, sosio ekonómika hodi bele sai sidadaun ida ne’ebe forte no independente. Misaun mak hakarak advoga vítima ka sobrevivente feto sira ne’ebé lian-la’ek hodi bele hetan rekoñesimentu ka atensaun husi Estadu ka Governu.
Entertantu, Centro Nacional Chega!I.P, hamri’ik nu’udar institutu públiku ida ne’ebé estabelese ho dekretu Lei no. 48/2016. Centro Chega! nia vizaun mak sosiedade ida ne’ebé inkluzivu, la repete istória passadu nian, moris iha dame, no respeitu ba direitus umanu. Centro Chega! nia misaun mak harii sentru Pós-konflitu ne’ebé prezerva memória passadu nian hodi promove direitus no valór umanu, harii parseria nasionál no internasionál hodi reforsa rede servisu sira atu implementa rekomendasaun sira husi Relatóriu Final Comissão de Acolhimento, Verdade e Reconciliação (CAVR)-Chega! No Comissão da Verdade e Amizade (CVA) – Per Memoriam Ad Spem, sira ne’ebé relevante.
Media Chega!.
