Dili – (08 Agostu 2025), Centro Nacional Chega!I.P liuhosi Divizaun Prezervasaun no Memorializasaun (DPM) organiza atividade diseminasaun informasaun kona-ba arkivu no Muzeu Chega! ba univeritáriu sira mai hosi Universidade 3 mak hanesan Universidade Oriental Timor Lorosa’e (UNITAL), Universidade da Paz (UNPAZ) no Universidade Dili (UNDIL) hamutuk na’in 40.
Atividade diseminasaun ne’e hala’o haktuir ba Artigu 5, Alinea 5 husi Dekretu Lei Nú. 48/2016 kona-ba kontinua promove no sosializa informasaun kona-ba Relatóriu Comissão de Acolhimento, Verdade e Reconciliação (CAVR)-Chega! no Comissão Verdade e Amizade (CVA) / Per Memória Ad Spem (PMAS) ba públiku atu públiku bele hatene.
Diseminasaun informasaun ida ne’e foka liu ba rezultadu kolesaun dokumentu sira desde períodu CAVR (2001-2005), Sekretariadu Tékniku Pós CAVR (2005-2008) no kontinua ba Mandatu Centro Chega!I.P hahú husi 2017 to’o agora. Atividade ida-ne’e ho objetivu eleva estudante sira-nia koñesimentu liga ho eventu istóriku pasadu kona-ba prosesu ukun rasik-an, no mós enkoraza sira atu bele hala’o peskiza iha Arkivu Centro Chega!.
Aprezentadór sira iha atividade ne’e mak hanesan, Xefi Departmentu Arkivu, Aventino de J. B. Ximenes, ko’alia kona-ba Arkivu, Xefi Departementu Memorializasaun, Januario Soares ko’alia kona-ba Muzeu no Espesialista Peskiza, Fernão dos Santos ko’alia kona-ba Peskiza Arkivistika: Fundamentu, Métodu no Aplikasaun.
Iha oportunidade hanesan, Miguel dos Santos nu’udar Prizoneiru Polítiku ne’ebé uluk dadur iha Antigo Comarca Antigo Balide fahe nia istória pasadu ba estudante sira kona-ba iha tempu ne’ebá Militar Indonézia halo detensaun, torturasaun no violasaun direitus umanus oin-oin iha Comarca laran.
Nia reforsa, ohin loron ema hotu goja independénsia no ema hotu goja liberdade, maibé hateke ba pasadu, moris laiha liberdade, hasoru dezafius oin-oin balun terus, susar, kanek no mate tanba hetan presaun oin-oin hosi Militar Indonézia tanba defende ukun rasik-an.
Hafoin Remata, estudante hotu hala’o vizita ba ezibisaun-sira no Sela Nakukun. Vizita ne’e hala’o ho objetivu atu lori estudante sira atu aprende no hatene liu-tan istória Timor-Leste nian ba prosesu luta ukun rasik-an.
Media Chega!.
