(Dili, 07 Juñu 2024) – Centro Nacional Chega! Instituto Publiku (CNC I.P) organiza kolókiu ho tema “Importánsia Politika Nasionál Arkivu ba Prezervasaun Patrimóniu Arkivistiku”, ne’ebé realiza iha Salaun Konferensi Centro Chega! Antigo Comarca Balide-Dili.
Objetivu prinsipal husi kolókiu ida-ne’e mak, atu hasa’e koñesementu públiku nian kona-ba importánsia arkivu iha prosesu konstrusaun nasaun no konstrusaun estadu. Kolókiu ida ne’e, atu hasa’e koñesementu públiku nian kona-ba importánsia polítika nasionál ka lei arkivu ba prezervasaun patrimóniu arkivistiku nian. No mos konsolida ideia no hametin rede servisu ba advokasia aprovasaun lei arkivu nian.
Tanba arkivu ne’e katak, atu dokumenta no perpeitua pasajen nasaun ida nian, inklui nasaun ida nia esperiénsia moruk-sira, prestasaun no eventu istorika importante-sira. Tan ne’e kultura arkivistika ne’ebé di’ak tulun nasaun ida atu koñese sira-nia an, iha abut ba konstrui sira-nia identidade nasionál no diresaun ba futuru. Iha sentidu ida-ne’e mak prezervasaun adekuada ba rejistu dokumentál importante iha prosesu konstrusaun nasaun nian.
Maske nune’e tinan rua-nulu-resin-rua ona dezde Timor-Leste restaura ninia independensia, to’o ohin loron Timor-Leste seidauk iha politika nasionál ba arkivu ka Lei Arkivu neʼebé mak define norma no diretris-sira sobre jestaun arkivu ne’ebé padronizadu ba prezervasaun património arkivistiku Timor-Leste nian.
Auzénsia politika nasionál arkivu ne’ebé seriu hodi prodús Lei Arkivu nian sai dezafiu ba pratika arkivistika iha Timor-Leste, liuliu aspetu legál kona-ba retensaun no eliminasaun dokumentál, transferénsia no akolimentu dokumentál, no mós lei asesu informasaun nian.
Responde ba situasaun ne’e mak Centro Chega!I.P realiza kolókiu ida-ne’e hodi reune instituisaun arkivistika públiku no privada-sira, no mós akademiku, istoriadór no peskizadór-sira hodi diskute no promove vizaun olistika sobre importánsia politika nasionál arkivu nian.
Rezultadu esperadu kolókiu ida-ne’e mak públiku informadu kona-ba importánsia arkivu. Públiku informadu kona-ba importânsia politika nasionál ka lei arkivu nian. Instituisaun arkivistika no parte interesada sira harii ekipa traballu ne’ebé mak sei halo advokasia ba aprovasaun Lei Arkivu nian.
(Media CNC)
