Dili – (06 Dezembru 2023), Centro Nacional Chega!I.P servisu hamutuk Asosiasaun Venu sei organiza Festivál Kultura Rezisténsia Populár (FKRP) durante loron haat hahú loron 7 – 10 Dezembru 2023, iha Dili ho tema “Funu, Memória, no Trauma”.
Festival Kultura Rezisténsia Populár ne’e hanesan eventu públiku ne’ebé demonstra kriatividade artistika kontemporanea oin-oin ne’ebé mak esplora efeitu psikolójiku husi funu ba Timoroan nia moris loron-loron nian, ka vida umana ne’ebé moris ho memória kona-ba funu no violénsia pasadu nian iha ninia kakutak.”
Festival ne’e mos hanesan kriatividade artistika ne’ebé demonstra liuhusi “pinta, instalasaun ka projesaun, eskultura, teatru, poezia, monólogu, múzika esperimentál, ka kombinasaun entre forma artístika oin-oin hodi kria arte performativa ne’ebé hamosu efeitu májiku ida”. Festival ne’e mos nu’udar eventu públiku ida ne’ebé sei kompleta ho bazar ba kulinária, artezenatu, arte kreativa, no divertimentu ka konsertu múzika livre no mós atividade edukativa (inklui ba labarik-sira) kona-ba arte no asuntu relevante sira.”
Objetivu prinsipal husi Festival Kultura Rezistensia ne’e, atu kontribui ba prosesu harii dame no rekonsiliasaun atu atinje meta boot Centro Chega! nian katak sosiedade la repete fila fali violénsia pasadu nian.
Atividade sira ne’ebé sei hala’o iha festival hodi hamosu efeitu kura kanek (Healing) kompleta ho palku prinsipáal tolu mak hanesan Palku Memoria, Palku Fitar, no Palku Esperança. Alende ne’e, entre palku hirak ne’e sei instala mos palku livre (area busking) no mos área play ground ba labarik sira.
Partisipante husi Festival Kultura Rezisténsia Populár ne’e mak sobrevivente no vítima sira konflitu pasadu nian, juventude, estudante husi nível sekundária to’o universitária, komunidade jerál, grupu ekonomia kriativa, grupu artezenatu, grupu artista, turista internasionál sira, akadémiku, diplomata, ajente governu, no sosidade sivíl sira.
Festival Kultura Rezisténsia Populár hanesan parte ida husi Programa Memorializasaun Integradu. Festival ne’e mos nu’udar aprosimasaun kulturál ida mak liuhusi aprezenta memória koletiva ho meiu kriativa iha forma artistika oin-oin, bele sai nu’udar espasu refletivu no didátika ida ba harii dame no rekonsiliasaun. Festival ne’e hahu iha loron 7 Dezembru nudar Loron Nasional Memoria nian no sei remata iha Loron 10 Dezembru nudar Loron Mundial ba Direitus Umanus.
(Media CNC)
