Dili – Centro Nacional Chega!I.P, liu hosi Diretór Ezekutivu, Hugo Maria Fernandes hamutuk ho Prezidente Konsellu Administrasaun Radiu Televizaun Timor-Leste (RTTL E.P), José Antonio Belo renova nota entendementu no mós asina kontratu foun ba kooperasaun entre instituisaun rua.
Objetivu husi renova nota entendementu, atu haforsa kooperasaun servisu institusionál ba Implementasaun Rekomendasaun Chega! no Rekomendasaun Per memoriam Ad Spem hodi halo diseminasaun no divulgasaun informasaun ba komunidade sira iha rai Iaran no rai li’ur hodi promove espíritu rekonsiliasaun atu nune’e povu bele moris hakmatek no partisipa iha dezenvolvimentu. Nota Entendimentu ida ne’e válida durante tinan tolu (3) nia laran.
Alende ne’e, Centro Chega! asina mós kontratu foun ho RTTL E.P atu fornese transmisaun direta talk show “memória ba esperansa” no produsaun pakote informasaun sira totál orsamentu ho valór USD $ 21,050.00 (Dollar Amerikanu Rihun Runulu Resin Ida, Limanulu). Entendimentu ida ne’e válida durante tinan ida (1) nia laran.
Diretór Ezekutivu Hugo Fernandes esplika, Centro Chega! asina nota entendementu ho RTTL E.P tanba RTTL E.P hanesan instituisaun estadu nian atu fahe informasaun kona-ba istória Timor-Leste ba públiku atu nune’e sira bele hatene.
“Kooperasaun ida ne’e atu hametin liu tan istória Timor-Leste nian no istória pasadu ema ida-idak nian bele fo sai iha kanál RTTL E.P”, dehan Hugo ba jornalista sira iha salaun konferensia Centro Chega! Antigu Comarca Balide-Dili, Segunda-feira (28/03/2022).
Razaun Centro Chega! fó sai informasaun istória povu Timor-Leste nian ba media RTTL E.P tanba durante ne’e istória ne’e Ema boot ka lideransa Timoroan sira nian de’it mak fó sai iha RTTL, maibé dalabarak ema baibain la fó sai.
Kooperasaun ida ne’e atu fornese espasu publiku ba ema hotu-hotu atu ema ko’alia sai nia istória saida mak akontese ba ema ne’e nia pasadu. Ita nia luta ne’e luta popular ida no ema hotu nia partisipasaun. Entaun CNC ho RTTL hatur kooperasaun ida ne’e oinsá atu dignifika no fó valorizasaun ba ema nia luta ida ne’e.
Ba tinan ida ne’e pakote tolu mak sei fo sai mak hanesan; dahuluk pakote kona-ba live thalk show iha pakote sanulu ita hahu iha fulan Marsu ba oin. Ho komponente CNC nian maibé barak liu kona-ba ema ne’ebé partisipa ativamente iha luta ida ne’e. daruak, komemorasaun eventu istóriku sira. Tinan-tinan CNC organia komekorasaun eventu istóriku kona-ba violasaun diritus umanus ne’ebé akontese barak iha Timor-Leste.
Datoluk mak CNC sei divulga informasaun ne’ebé iha relasaun ho siensia hanesan seminario tematiku sira oinsá bele aumenta públiku nia koñesimentu ho tema sira atu sira bele hatene.
Iha fatin hanesan, Prezidente Radiu e Televizaun Timor-Leste (RTTL E.P), José Antonio Belo informa RTTL E.P asina MoU ho CNC atu implementa atividade diseminasaun ba iha kanal RTTL E.P.
“RTTL E.P hanesan orgaun públiku ida ami iha dever atu bele hala’o ami nia knar hodi apoiu orgaun públiku sira seluk hodi bele desimina informasaun ba públiku, tanba ami hanoin espasu RTTL E.P barak mamuk entaun kooperasaun ne’e ami fob a sira atu ala’o atividade ne’e”, nia informa.
RTTL E.P ohin lofon iha de’it 18 oras depois seis oras tempu ne’e sei lovre hela tanba ne’e mak sira fo espasu ba públiku atuprenze programa hodi fo sai istória ba komunidade sira. Akordu kooperasaun ne’e ba tinan ida nian. nota entendementu ne’e ba tinan tolu (3) tuir orsamentu estadu nian.
Centro Nacional Chega!I.P, Da Memória à Esperança (Centro Chega!) hamri’ik nu’udar institutu públiku ida ne’ebé estabelese ho dekretu Lei no. 48/2016 no tutela direitamente ba Primeiru Ministru. Centro Chega! nia vizaun mak: “Sosiedade ida ne’ebé inkluzivu, la repete istória passadu nian, moris iha dame, no respeitu ba direitus umanu”. Centro Chega! nia misaun mak: “Harii sentru Pós-konflitu ne’ebé prezerva memória passadu nian hodi promove direitus no valór umanu, harii parseria nasionál no internasionál hodi reforsa rede servisu sira atu implementa rekomendasaun sira husi Relatóriu Final Comissão de Acolhimento, Verdade e Reconciliação (CAVR)-Chega! No Comissão da Verdade e Amizade (CVA) – Per Memoriam Ad Spem, sira ne’ebé relevante”.
Media Chega!
