Oe-Cusse – (18 Outobru 2024), Festival Fronteira 2024 ho tema “Interkambiu Kulturál ba Hametin Rekonsiliasaun” ne’ebé hala’o durante loron 5 hahu (14-18), iha Rejiaun Administrativu Espesial Oekuse Ambeno (RAEOA). Festival durante loron 5 ho atividade mak hanesan, aprezentasaun dansa kultura, grupu muzika, feira indústria kreativa kulturál, vizita sítiu istóriku, wokshop kona-ba arte ba amizade no rekonsiliasaun no dialógu interativu.
Ministru Administrasaun Estatál (MAE), Tomás do Rosário Cabral iha diskursu enseramentu katak, Festival Fronteira ne’e importante tanba ne’e, promete sei apoiu Festival Fronteira 2025 ne’ebé sei realiza iha Munisipiu Covalima.
“Hau sei prontu atu fo asistensia nafatin ba ita boot sira”, dehan Ministru iha diskursu enseramentu Festival Fronteira 2024 iha kampu Oe-bau, Oe-Cusse.
Ministru hatutan, MAE sei fo apoiu asistensia liu-liu halo koordenasaun servisu ho autoridade lokál sira iha Munisipiu Covalima atu mobiliza komunidade hodi partisipa maximu iha Festival Fronteira 2025 tanba atividade ne’e importante no presiza komunidade sira nia partisipasaun.
MAE sei organiza autoridade lokál no komunidade sira ne’ebé hela besik Munisipiu Covalima hanesan Munisipiu Manufahi, Ainaro no Bobonaro atu partisipa. Alende atividade Festival Fronteira 2025, Povu Timor-Leste sei hala’o komemorasaun 28 Novembru loron Proklamasaun Unilateral Independénsia Timor-Leste nian ba dala-50.
Partisipasaun komunidade nian importante liu-liu involvimentu iha atividade sira hanesan aprezentasaun dansa kultura, grupu musika, feira indústria kreativa kulturál. Alende ne’e involve mos iha seminariu no dialógu interativu sira atu komunidade sira bele hatene kona-ba Festival Fronteira ho tema “Interkambiu Kulturál ba Hametin Rekonsiliasaun”.
“Halo iha Covalima, Timor-Leste mos sei selebra 50 anos ba proklamasaun unilateral Timor-Leste nian. Hau hanoin ida ne’e ba komisaun organizadora ba SEAK no Chega! tinan oin ita sei halo di’ak liu tan”, Ministru garante.
Festival Fronteira ne’e importante, Ministru argumenta, tanba Festival ne’ebé Centro Nacional Chega!I.P no Ministeriu Juventude Desportu Arte no Kultura (MJDAK) liu husi Sekretariu Estadu Arte no Kultura (SEAK) halo nu’udar komprimisu no vontade politika IX Governu nian atu hametin rekonsiliasaun entre Timoroan sira iha Timor-Leste no Timoroan sira iha Nusa Tengarah Timur (NTT) no mos sidadaun Indonézia liu-liu ba sira iha fronteira hanesan Munisipiu Malaka, Belu, So’e, Kefa no Kupang.
Festival Fronteira projeta ba promosaun ba dame, fraternidade umana, valoriza diversidade no pluralidade kultura entre Timor Leste no Indonézia, promove konetividade no empodera komunidade ka sosiedade sira liu husi aspeitu kulutral no Istória ne’ebé refleta no inspira interasaun sosial, bazeia ba prinsipiu respeita direitus umanus, toleransia no solidariedade umana no hari’i hikas kultura dame ne’ebé nia abut mai husi fiar, matenek lokál, tradisaun, kultura no arte ne’ebé kontribui ba respeita valores umanu.
Nune’e, Festival ida ne’e hatudu komprimisu estadu Timor-Leste nian kona-ba promosaun dame, prezervasaun kultura iha illa Timor. Kona-ba promosaun dame, Ministru fo exemplu, Timor-Leste fundadór ba organizasaun g7+ nia pensamentu mak atu promove dame no hametin rekonsiliasaun.
G7+ mak organizasaun intergovernmental ne’ebé hari iha dia 10 fulan Abril tinan 2010 iha Dili, Timor-Leste. No organizasaun ne’e halibur nasaun hamutuk 20 hanesan, Afghanista, Burundi, Central African Republic, Chad, Comoros, Cote d’lvoire, Democratic Republic of Congo, Guinea, Guinea Bissau, Haiti, Liberia, Papua New Guinea, Solomon Island, Sao Tome and Principe, Sierra Leone, Somalia, South Sudan, Timor-Leste, Togo no Yemen.
Festival Fronteira ida ne’e pensamentu ida atu promove dame no hametin rekonsiliasaun. “Ho atividade sira ne’e hala’o iha RAEOA, bele sai sasukat ida, bele sai programa boot ida ba rai sira seluk”.
Tanba ne’e, “hau lori governu nia naran SEAK, CNC, REAO no ekipa lojistika PNTL no F-FDTL ne’ebé konsege tau ordena ba iha atividade ida ne’e, nune’e Festival Fronteita 2024 bele la’o ho di’ak ohin kalan ita bele ensera. Ho frakesa ne’ebé iha ita hahu prepara ba futuru ne’ebé di’ak”.
Iha tinan kotuk Festival Fronteira 2023 hala’o iha Munisipiu Bobonaro. Iha tinan ida ne’e Festival Fronteira 2024 hala’o iha Rejiaun Administrativu Espesial Oekuse Ambeno (RAEOA). Tinan oin Festival Fronteira 2025 sei hala’o iha Munisipiu Covalima no sei halo komemorasaun ba loron proklamasaun Unilateral Independénsia Timor-Leste nian ba dala-50 iha Suai Vila, Munisipiu Covalima.
“Hau bele garante ba Sekretariu Estadu Arte Kultura no Centro Chega!, partisipasaun sei maximu tanba autoridade tutela iha ministeriu ida ne’e, ita bele organiza didiak, nune’e atividade sira iha Covalima bele sai di’ak liu tan. Ita hala’o beibeik, aban bainrua sai boot liu,” Ministru promete.
(Media CNC)
