Lautem – (8 Agusto 2025), Centro Nacional Chega!I.P servisu hamutuk ho Autoridade Lokál, Sobrevivente, Familia Sobrevivente no Komunidade sira organiza komemorasaun loron istóriku Levantamentu Armada 8 Agusto 1983 ba dala-42, Suku Leuro, Postu Administrativu Lospalos, Munisipiu Lautem.
Vitima no sobrevivente sira hosi akontesimentu Levantamentu Armada 8 Agusto 1983 husu ba governu atu tau matan ba sira tanba, desde Timor-Leste restaura ninia independensia to’o mai ohin loron, laiha organizasaun ka instituisaun ida mak tau matan ba sira hanesan vitima no sobrevivente ba funu nian.
Liu hosi eventu komemorasaun ne’e, vitima no sobrevivente sira hato’o sira nia hanoin no sentimento ba loron importante ne’e.
Sobrevivente, Lucinda da costa “Lucinda Lalu Cai” esplika, nia sente kontente ho komemorasaun ne’e tanba governu liuhosi Centro Chega!I.P fo apoiu komemorasaun ne’e nu’udar rekoñesimentu no valorizasaun ida ba vitima no sobrevivente sira. Nia haktuir, akontesimentu Levantamentu Armada 8 Agusto 1983, nia laen involve iha levantamentu ne’e, depois nia laen halai sai ba ailaran ikus mai nia laen mate. Miliar Indonézia halo violasaun direitus umanus ba nia (Lucinda). Ohin loron moris hanesan feto faluk. Agora hela iha nia familia, uma rasik laiha.
Sobrevivente Olinda dos santos “Puireci” haktuir, konsekuensia hosi Levantamentu ne’e Militar Indonézia halo violasaun direitus umanus ba nia hanesan, baku, tebe iha hirus matan no seluk tan. “Situasaun sira hansan ne’e hau tur mesak halo hanoin barak no hau hetan terus”. Nia husu governu atu halo uma ida ba nia.
Sobrevivente, Emiliana Costa Viegas “Nana Hoto” informa, konsekuensia hosi levantamentu ne’e Militar Indonézia kaer nia laen no lori ba oho, nia mos hetan persegisaun oin-oin hosi Militar Indonézia. Ohin loron nia moris hanesan feto faluk ida. Bainhira tur mesak hanoin fali memória moruk pasadu afeita ba nia kondisaun saude halo nia ulun moras no seluk tan.
Sobrevivente, Teresa Fernandes dehan, Levantamentu Armada 8 Agusto 1983, nia hetan violasaun direitus umanus hosi Militar Indonézia no mos halo persegisaun oin-oin ba nia, Miliar Indonézia sempre bolu nia ba halo inkeritu tanba durante ne’e apoiu mane hodi luta kontra Invazór Indonézia. Iha tempu ukun rasik-an vitima no sobrevivente sira seidauk hetan apoiu ruma hosi organizasaun naun governamental no instituisaun governu.
Media Chega!.