Suai – (06 Setembro 2025), Centro Nacional Chega!I.P servisu hamutuk ho Saúde Munisipiu Covalima halo Konsultasaun Masal (Tratamentu Saúde) ba sobrevivente sira. Alende Konsultasaun Masal, Centro Chega!I.P mos fo apoiu Umanitáriu ba sobrevivente sira mais vulneravel iha Munisipiu Covalima.
Ho atividade Konsultasaun Masal no apoiu Umanitáriu ne’ebé mak Centro Chega!I.P fo ba Sobrevivente sira hato’o sentimentu kontente tanba bele hetan Tratamentu Saúde ba sira nia kondisaun Saúde ne’ebé fo impaktu ba sira nia atividade lorloron nian no apoiu Umanitáriu ne’e mos bele hakmaan sira nia sofrementu. Atividade Konsulta Saúde no apoiu Umanitáriu ne’e hala’o iha ámbitu komemorasaun Masakre 6 Setembro 1999 Suai (Masakre Setembro Negro 1999 Suai) ba dala-26.
Tuir Sobrevivente, Gustavo Afonso Domirai hato’o sentimentu kontente tanba bele hetan apoiu Umanitáriu liu-liu nesesidade baziku sira hosi Centro Chega!I.P bele ajuda nia hodi utiliza ba nesesidade loron-loron.
Nia haktuir tan, agradese ba Saude Munisipiu Covalima tanba servisu hamutuk ho Centro Chega!I.P fo Tratamentu Saúde ba sira hodi hatene sira nia moras no simu ona aimoruk atu nune’e bele di’ak lalais.
“Hau sente kontente tanba bele hetan apoiu nesesidade baziku hosi hosi Centro Chega!I.P. Hau nia atividade loron-loron iha uma de’it. Halo to’os mos labele tanba hau nia kanotak ne’e moras maka’as. Hau nia ferik-oan mak halo tos, hau akompaña de’it. Iha loron Domingu, 11 Abril 1999, iha Olbes hun, Milisia sira kaer hau no fai ho kilat, hau monu tun ba rai, sira lori hau soe tun iha mota laran iha dadersan no lokraik mak moris fali”, dehan Sobrevivente Gustavo.
Sobrevivente, Regina Afonso esplika, nia sente kontente ho apoiu ne’ebé mak Centro Chega!I.P fo tanba bele ajuda nia hodi uza ba nesesidade loron-loron nian. Nia mos agradese ba Saúde Munisipiu Covalima bele fo ona Tratamentu Saúde.
“Hau sente kontente governu bele fo apoiu. Foin primeira vez hetan apoiu nesesidade baziku hosi Centro Chega!I.P, kona-ba Konsulta Saúde ne’e di’ak tanba doutor sira haree hau nia moras no sira mos fo aimoruk ba hau”, Sobrevivente Regina espresa ho kontente.
Sobrevivente, Aleixo Gusmão hateten, iha tinan 1999 milisia sira kaer nia kastigu iha KODIM. Durante kastigu iha KODIM sira tuku, tebes no baku no lori nia ba hatama iha bee laran. Ho Tratamentu Saúde ne’ebé mak Saúde Munisipiu Covalima fo ne’e di’ak tebes tanba sira fo aimoruk.
Durante atividade Konsulta Saúde Masal no apoiu Umanitáriu ne’e hetan partisipasaun maximu hosi sobrevivente sira no atividade ne’e la’o ho di’ak.
Media Chega!.