Diretora ACbit Sra. Manuela Leong Pereira hateten, sobrevivente barak mate, lagoja sira nia vida iha Ukun rasik-an no mate ho kabun mamuk.
Sra. Manuela Leong Pereira hato’o liafuan ne’e bainhira sai hanesan oradora iha kolókiu nasionál ne’ebé Centro Nacional Chega!I.P organiza kona-ba Reparasaun Vítima 1974-1999 ho tema jerál “Memorializasaun Dalan Ba Dignifika Sobrevivente”, ne’ebé realiza iha salaun Konferénsia Centro Chega! Antigo Comarca Balide-Dili, loron 16 Jullu 2021.
Sra. Manuela Leong konsidera kolókiu nasionál ne’ebé Centro Chega! realiza ne’e importante tebes tanba bele ko’alia kona-ba asuntu reparasaun ne’ebé sai hanesan asuntu importante ba ema hotu hodi ko’alia, maibé haluha iha asaun.
Asuntu sobrevivente nu’udar luta naruk ida, sobrevivente barak mate, lagoja sira nia vida, fulan ida sobrevivente feto ida mate husi Munisípiu Viqueque, fulan ida liu ba sobrevivente mane ida husi Munisípiu Dili mate. Hotu-hotu mate iha uma, la ba ospitál.
“Ita triste, ema mate iha uma, hotu-hotu lagoja, depois lahetan buat ida, ita bele dehan katak mate ho kabun mamuk. Ita triste, maibé di’ak tanba ita ko’alia nafatin, vitima konflitu pasadu ema barak hetan problema psikolojiku, ema barak bulak, exemplu ida iha tasitolu, nia lako’alia ho ema ida, nia haree mane hotu-hotu lagosta tanba nia hetan violensia seksual”, Sra. Manuela haklaken ho laran triste.
Husi tinan 2015 to’o mai tinan 2020 ACbit konsege identifika ona sobrevivente sira hamutuk ema 365. Iha relatóriu 2019 feto sira ho idade 60 ba leten hamutuk 18 mak mate ona. Sira ne’e lagoja sira nia vida, uma de’it mos laiha. Depois iha 25 pesoas husi 77 laiha ida hetan apoiu husi NGO no governu.
Nia fó hanoin katak, durante ne’e, MSSI apoiu barak ba veteranus, ba familia martir sira hotu, maibé ba sobrevivente laiha. Tuir lolos estadu tenke haree rekomendasaun CAVR hodi integra iha programa, hodi apoia ba sobrevivente sira.