Díli, 03 Fevereiru 2025 – Centro Nacional Chega!I.P hamutuk ho institusaun tutelada sira iha Gabinete Primeiru Ministru (GPM), Prezidensia Kosellu Ministru (PKM), Sekretariu Estadu Komunikasaun Sosial (SEKomS), Sekretáriu Estadu Igualdade (SEI) no instituisaun sira ne’ebé tutela ba ministériu relevantes partisipa serimonia isár bandeira nasional iha Palásiu Governu Dili, Timor-Leste. Serimonia prezide husi Vise–Primeiru–Ministru, Ministru Koordenadór Asuntu Sosiál, Ministru Dezenvolvimentu Rural no Abitasaun Komunitária (VPM-MKAS-MDRAK), Eng. Mariano Assanami Sabino.
Iha diskursu isár bandeira nasional, Vise–Primeiru–Ministru, Eng. Mariano Assanami Sabino hateten, Palásiu Governu (Praça da Proclamação da Independência) nu’udar fatin istóriku ba Timoroan sira tanba iha tinan 1975 heroi lubuk ida mak hamrik iha fatin ne’e isár bandeira nasional hodi proklama unilateralmente ita nia independensia.
Sira nia luta mak liberta patria no liberta povu. Patria ita hetan ona, ita sai nasaun ida independente, livre no demokratiku, ita iha simbolu nasional hanesan, iha bandeira nasional, iha inu nasional no sira seluk tan.
Ohin ita hamrik iha fatin ne’e, ita hatutan sira nia luta mak libertasaun povu. Libertasaun povu nudar vizaun ida. Atu atinji vizaun ida ne’e ita tenke komunga komprimisu de onra ba ita idak-idak atu iha komitementu nafatin kaer juramentu ne’ebé mak ita halo wainhira ita sai funsionáriu públiku.
Kaer ba juramentu ne’ebé ita halo, kanta ita nia inu nasional patria-patria, kanta inu funsaun públiku ne’e hatudu katak ita halo komprimisu ba ita nia-an. Ita nia komprimisu labele kahur ho kor partidu politiku tanba partidu politiku ne’e konsekuénsia husi demokrasia. Tanba ne’e, ohin ita mai hamrik iha fatin ida ne’e ita halo komprimisu ba ita nia servisu.
“Ohin ita fo kontinuidade ba libertasaun povu, tanba ne’e husu nafatin ba ita, iha loron ida ne’e i halo komprimisu de onra ba ita idak-idak atu iha komitmentu nafatin kaer juramentu ne’ebé mak uainhira ita sai funsionáriu públiku kaer ita nia inu funsaun públiku nian i inu nasional”, dehan Vise iha diskursu serimonia isár bandeira nasional iha Palsiu Governu, Díli, Segunda-feira, (03/02/2025).
Vise subliña, bainhira ita kanta inu nasional patria-patria ita halo komprimisu, ita nia liman iha ita nia fuan atu hatudu ita nia totalidade. Ita nia komprimisu laiha rezerva. Wainhira ita nia fuan ne’e sei fekit sei moris, ita fo tomak ba ita nia rai.
Ohin ita iha ona dijitalizasaun ita iha ona metodu absensia ne’ebé mak oin-oin maibé lato’o ba ita, ita nia fuan mak tenke kontrola ita katak ita iha ne’e, ita tenke fo kontinuidade nafatin. Liu husi isár bandeira nasional ne’e hatudu, halo refleksaun ba ita oinsa ita nia komitmentu, oinsa ita nia seriedade, oinsa ita nia konsisténsia no ita nia disiplina.
“Ba funsionáriu sira hotu tenke halo refleksaun ba ita idak-idak nia-an atu muda ita nia haree ba oin, muda ita nia hanoin, muda ita nia hahalok para muda ita nia moris. Ita dalaruma haree mai husi grupu oin-oin, mai husi partidu oin-oin maibe ne’e konsenkuénsia husi nasaun Republika Demokratika. Nasaun demokratiku fo opsaun oin-oin ba ita, fo partidu oin-oin ba ita ho multi organizasaun, maibé sira ne’e hotu atu reforsa ita nia konstrusaun estadu, reforsa ita nia unifikasaun katak ita mesak timoroan”, Vise PM sujere.
Ohin dezafiu boot ne’ebé mundu hasoru, ita sei hasoru, maibé ho ita nia unidus ho ita nia konsisténsia no komitmentu kaer ba idak-idak nia responsabilidade, idak-idak nia knar, ita hotu hamutuk ita bele lori rai ne’e ba oin.
Entertantu, seremónia isár da bandeira nasional hanesan atividade regular ida ba Instituisaun Estadu no Governu ne’ebé hala’o kada fulan iha semana dahuluk, atu hatudu sentidu nasionalizmu no patriotizmu atu servisu povu no rai ida ne’e ho di’ak.
Media Chega!