Nicolau dos Reis Lobato (Nicolau Lobato) moris iha loron 24 de Maio de 1946, iha Soibada, Manatutu. Nia nudar oan-mane boot hosi maun-alin nain 13, ne’ebé hotu-hotu mate iha funu-laran, inklui ninia inan, hela deit nain ida mak moris, Rogerio Tiago Lobato.
Nicolau Lobato eskola iha Soibada, Manatuto antes kontinua estudus iha Seminariu Dare. Iha tinan 1965, ho idade tinan 19 nia deside sai hosi Seminariu Dare. Nia mehi atu kontinua estuda direitu iha Coimbra, Portugal. Maibé tanba la konsege finaliza ninia estudu iha eskola sekundariu, nuneé iha tinan 1966 Governu Portuguesa haruka nia ba sai membru forsa-armada Portuguesa ninian ho deviza sarjentu.
Wainhira hakotu ninia misaun iha forsa armada Portuguesa no moris hanesan ema sivil, Nicolau deside fila mai Dili, no servisu hanesan funsionariu publiku iha misaun Agronomia, neébe ikus mai transforma ba Deparatmentu Finansas.
Iha tinan 1974, hafoin akontese revoluasaun kravu iha Portugal, Nicolau husik hela ninia servisus hanesan funsionariu publiku no dedika nia-an hodi hari Asosiasaun Sosial Demokratiku Timorense (ASDT), neébe ikus mai transforma ba Frente Revolusionariu Timor-Leste Independente (FRETILIN).
Wainhira Uniaun Demokratik Timor (UDT) halao movimentu armada iha loron 11 de Agosto de 1975, Nicolau lidera insureisaun armada hodi responde iha dia 20 de Agosto de 1975, loron neébe rekonhese hanesan loron moris FALINTIL.
Iha loron 28 de Novembro de 1978 FRETILIN unilateralmente proklama independensia Timor-Leste, hases-an hosi rejime Portugal. Pais foun ida neé ofisialmente hanaran Republica Democratica de Timor-Leste. Iha loron 30 de Novembro de 1975 FRETILIN estabelese Governu ba dahuluk, Francisco Xavier do Amaral nudar Presidente da Republica no Nicolau Lobato sai nudar Primeiru Ministru.
Dader-san, iha loron 7 de Dezembro de 1975, Indonesia invade Timor-Leste, neébe tiru mate mos Nicolau Lobato nia espouza, Isabel iha Portu Dili, maibe nia oan-mane konsege salva. Momentu neéba kedas Forsas Armadas FRETILIN husik hela kapital Dili no hases-an ba foho hodi kontinua gerilha. Nicolau Lobatu lidera funu gerilha neé durante tinan tolu, no iha tinan 1977 sai nudar Presidente da Republica.
Iha loron 31 de Dezembro de 1978, Nicolau Lobatu hasoru embuskada forsa espesial Indonesia neébe komanda hosi Prabowo Subianto. Nicolau Lobato mate iha batalha laran hafoin hetan tiru iha estômagu. Ate a data, Ninia mate-isin ladauk hatene halot iha neébe.*
Fontes Prinsipal: Sitiu Presidencia da Republica de Timor-Leste.