Diretór Ezekutivu Centro Nacional Chega!I.P, Sr. Hugo Maria Fernandes konsidera livru “Politik Berdarah Timor Leste”, ne’ebé lansa iha loron 9 Jullu 202 iha Salaun Konferénsia Centro Chega! Antigo Comarca Balide – Dili ne’e ‘nesesariu’ no di’ak ba jerasaun foun sira hodi aprenden tanba livru ne’e ko’alia kona-ba istória konflitu Timor ne’ebé akontese iha tinan 1974 no 1975.
Sr. Hugo Fernandes haktuir, livru ida ne’e iha ligasaun ho Livru telatóriu Chega! no Per Memoriam Ad Spem nian hamutuk 2500 paginas ne’ebé Centro Chega! Uza hodi implementa iha servisu Chega!.
“Hau hanoin buat ida importante husi livru ida ne’e mak konflitu, ne’ebé lori ita hotu atu halo justifikasaun ba rekoñesimentu”, dehan Hugo iha diskursu lansamentu livru rua, “Politik Berdarah Timor-Leste” no “Lalehan Tanis”, iha Salaun Konferensia Centro Chega! Antigo Comarca, Balide.
Tanba ne’e, hanesan Diretór Ezekutivu Centro Chega! fó apresiasaun ba eskritor Sr. Elidio Agusto Guterres tanba bele hakerek livru “Politik Berdarah Timor Leste” ho analitika ne’ebé mai husi literatura review uza teoria rekoñesimentu husi matenek na’in Axel Honneth.
Hugo sublina, Sr. Elidio Agusto Guterres nu’udar Timoroan dahuluk ne’ebé hakerek livru analiza konflitu Timor husi perspetiva filozofu ne’ebé sei moris hela, nia teoria kontinua hetan dezafius.
Eskritor Elidio Agusto Guterres hateten, livru “Politik Berdarah Timor Leste” hanesan rezultadu ida husi peskiza sientifiku masteradu nian iha Universidade Gajahmada Malang (UGM) uza metodu kualitativu bibliografia..
Tuir nian, intensaun hakerek istoria konflitu ne’ebé akontese iha tinan 1974 no 1975 tanba hakarak hatene konflitu ne’ebé akontese iha tinan 1974 no 1975 entre timoroan ho timoroan oho malu tanba partidu politiku sira hanesan UDT, APODETE, FRETLIN, KOTA no TRABALHISTA sira laiha rekoñesimento ba sira nia aktu.
Enkuantu, Livru kona-ba “Lalehan Tanis” mai ho istoria badak no kahur ho poezia. Tanba sa? mak lalehan tanis tanba funu ne’ebé akontese iha tinan 1975 no 1999 Timoroan barak mate, oho, kastigu, tortura, abortu no sira seluk tan, lalehan nu’udar inan ida haree sofrementu ne’e nia tanis.
Entertantu, Sekretariu Estadu Komunikasaun Sosial (SEKOMS), Mericio Juvinal dos Reis “Akarak” agradese ba Centro Chega! tanba bele oferese fatin hodi halo lansamentu ba livru. Agradese mos ba Eskritor Elidio Agusto Guterres tanba hakerek ona livru “Politik Berdarah Timor-Leste” no “Lalehan Tanis” hodi inspira joven sira atu aprende hakerek barak labele halimar de’it media social mak barak.