Dili, 21 Dezembru 2022 – Centro Nacional Chega!I.P liuhusi Divizaun Edukasaun no Fórmasaun (DEF), durante loron tolu (3), fó fórmasaun ba membru Polisia Nacional Timor-Leste Munisipiu Dili hamutuk na’in 65.
Tema ba fórmasaun ne’e mak “direitus umanus Timor-Leste iha Tempu Uluk ba Membru PNTL”. Fórmasaun ne’e realiza iha salaun konferensia Centro Chega!, Antigo Comarca Balide-Dili.
Tuir Inspektór Asistente, Segundu Komandante Polisia Nacional Timor-Leste (PNTL), Postu Dom. Aleixo, Domingos Pinto hateten, PNTL atu mellora prestasaun servisu tenke hetan fórmasaun.
“Liuhusi fórmasaun ida ne’e bele fanu no loke ami nia hanoin. Apresia tebes ba materia sira ne’e. Ami fiar katak Polisia Nacional Timor-Leste (PNTL) sei sai polisia ida ne’ebé di’ak, maduru, professional,” dehan Domingos ba Media Chega!.
PNTL estabelese iha 2000, nu’udar instituisaun estadu ne’ebé fó seguransa ba povu no nasaun tenke hatene direitus umanus no istória pasadu, atu iha atuasaun ruma labele repete-tan violasaun direitus umanus ne’ebé akontese iha pasadu.
Ho fórmasaun ne’ebé iha, Inspektór Asistente esplika, nia sente kontente tanba liuhusi fórmasaun ne’e, bele hasa’e sira nia koñesimentu iha área istória no direitus umanus. Tanba ne’e, rekomenda ba CNC atu kontinua fó fórmasaun ba Instruktór Akademia PNTL sira, atu sira hatutan materia ne’e ba to’o iha membru sira.
“Agora ba oin Polisia Nacional Timor-Leste sei sai parseiru di’ak ho CNC, atu bele mellora di’ak liu tan, polisia nia atetude di’ak, sura mós CNC nia kontribuisaun. No matenek ne’ebé ami hetan prontu atu implementa iha servisu fatin,” nia Promete.
Iha fatin hanesan, Segundu Xefe Investigasaun Kriminal Munisipiu Dili, Anita Claudos, konsidera formasaun ida ne’e di’ak tebes ba sira tanba iha fórmasaun ne’e ko’alia kona-ba istória Timor-Leste hahú husi 1974-1999.
Iha Timor-Leste dalaruma ita rona de’it Istória Timor-Leste, ita nunka hasoru deireitamente sobrevivente sira ne’ebé mak uluk luta no saktifika sira nia-an ba independensia. Ohin konsege hasoru no rona sira nia istória. Esperensia ida ne’e sai hanesan bukae ida ba ami, liu-liu ami ne’ebé tun direitamete ba iha terreñu atu labele repete fila fali violasaun direitus umanus pasadu.
“Hau rekomenda de’it ba CNC, fórmasaun hanesan ne’e kontinua nafatin ba iha membru PNTL hotu-hotu, iha nasaun ida ne’e, atu nune’e sira bele hatene saida mak direitus umanus liga ba sira nia servisu lorloron nian,” nia rekomenda.
Media Chega!