Dili, loron 06 Outubru 2020 – Diretór Centro Nacional Chega! Sr. Hugo Maria Fernandes kontinua apela ba Timoroan tomak, nune’e mós ba Membru F-FDTL atu aprende husi konflitu interna entre Timoroan iha pasadu atu “Labele Repete Tan” no labele komete aktu violentu hanesan, ne’ebé halo husi Militár Indonézia iha tempu okupasaun.
Diretor Hugo Fernandes akresenta, Membru F-FDTL tenke sai Forsa Defeza ida ne’ebé profesionál hodi asegura protesaun direitus umanus.
Diretór Ezekutivu Centro Chega! hato’o liafuan ne’e iha Formasaun kona-ba Direitus Umanus ba Membru F-FDTL husi Kuartel Jerál no Unidade Polísia Militár Tranzitóriu iha Salaun Quartel Geral Quintal Boot, Dili.
Iha biban ida ne’e, DE Centro Chega! mós fahe informasaun sira relasiona ho mekanizmu Justisa Tranzitóriu ne’ebé akontese iha Timor-Leste nu’udar nasaun post-konflitu hafoin tinan 24 iha okupasaun Indonézia. Centro Chega! nia papel importante mak asegura instituisaun sira governu nian atu adopta rekomendasaun sira husi Relatóriu Chega! no Relatóriu Per Memoriam Ad Spem (CVA) iha sira nia polítika, inklui ba instituisaun seguransa nian hanesan PNTL no F-FDTL, liu-liu iha materia formasaun ba direitus umanus.
Formasaun ne’e realiza tanba kooperasaun entre Provedoria dos Direitos Humanos e Justica (PDHJ) Timor-Leste ho Centro Chega! no parseiru xave sira hanesan F-FDTL rasik, Institutu Defesa Nasional, ho apoiu orsamentu no rekursu umanu husi UN Human Rights Unit iha Timor-Leste.
Totál partisipante iha Formasaun Direitu Umanus ba membru F-FDTL husi Quartel Geral no Unidade Polísia Militár ne’e hamutuk na’in 23, inklui feto na’in 3.