Manufahi – (26 Novembru 2025), Vise Ministru ba Asuntu Parlamentar (VMAP) Adérito Hugo da Costa hamutuk ho Prezidente Konsellu Administrasaun, Manuel Pereira ho Autoridade Lokal no mos Asosiasaun Vitima Konflitu Politiku 1974-1999 (AVKP) entrega Uma Memória ba Esperansa (UMbE) ba Sobrevivente, Agata da Silva, iha Aldeia Caluhun, Suku Berloic, Postu Administrativu Alas, Munisipiu Manufahi.
UMbE entrega ba Sobrevivente, Agata da Silva tanba nu’udar Vitima ba Violasaun Direitus Umanus Pasadu no agora moris vulneravel liu. Ho problema ne’ebé mak nia hasoru halo nia sofre trauma bainhira hanoin hikas fali akontesimentu sira ne’ebe akontese ba nia iha tempu okupasaun nian.
Haree ba problema ne’ebé nia hasoru iha pasadu ligadu ba nia kondisaun moris uma ne’ebé lafavoravel tanba ne’e mak Centro Chega!I.P halo Uma ho medida 63m³, kompostu hosi kuartu 3, haris fatin 1, sala vizita I, no dapur iha parte liur ho medida 7.5m.
Objetivivu entrega UMbE ba Sobrevivente Agata da Silva, atu valoriza no dignifika nia kontribuisaun luta ba ukun rasik-an. No mos nu’udar asaun implementasaun rekomendasaun Chega! kona-ba “Reparasaun ba Vitima”.
Tuir dadus Centro Chega!I.P liu hosi Divizaun Solidariedade ba Reparasaun (DSR) rejistu katak, hosi 2021 to’o 2025, Centro Chega!I.P entrega ona Uma Memoria ba Esperansa (UMbE) ba sobrevivente mais vulneravel hamutuk 24.
Antes ne’e, Centro Chega!I.P harii ona UMbE hamutuk 20 ba sobrevivente sira. Iha tinan 2025, Centro Chega!I.P liu hosi Divizaun Servisu Reparasaun (DSR) halo tan UMbE 6 ba sobrevivente sira bazea ba rekomendasaun sira hosi relatóriu Chega! no PMAS liu-liu ba asuntu reparasaun nian. Divizaun ida ne’ebé responsavel ba programa ida ne’e mak Divizaun Servisu Reparativu (DSR) tanba sira nia servisu mak estabelese programa solidariedade apoiu ba sobrevivente no grupu vulneravel sira ne’ebé hasoru violasaun direitus umanus iha pasadu.
Detallu informasaun klik: PDF-II