(Dili, 14 Novembru 2024) Centro Nacional Chega!I.P parseria ho Ministeriu Edukasaun (ME) organiza kompetisaun sertame nasional Istória, Direitus Umanus no Edukasaun Sidadania Iha Ámbitu Komemorasaun Loron Proklamasaun Independénsia ba dala-49. Kompetisaun sertame nasional ne’e partisipa husi Eskola Sekundariu hamutuk 13 husi Munisipiu 10 mak hanesan, Eskola Sekundariu Jerál 02 Vila Nova Baucau, Eskola Sekundariu Katolika Nosa Senhora de Fatima Railako-Ermera, Eskola Sekundariu Jeral Olocassa Ossu-Viqueque, Eskola Sekundariu Publiku Nino Konis Santana Lospalos-Lautem, Eskola Sekundariu Cafe Manatuto, Eskola Sekundariu Cafe Dili, Eskola Sekundariu Cafe Likisa, Eskola Sekundariu Kristy Sword Gusmão Laleia-Manatuto, Eskola Sekundariu Jeral Hu Iso Lara Iso Maubara-Likisa, Eskola Sekundariu Jeral Nicolão Lobato Tasi Tolu-Dili, Eskola Sekundariu Jeral 5 de Maiu Becora-Dili, Eskola Sekundariu Jeral Malere-Aileu, Eskola Sekundariu Jeral Dom. Martinho Lopez Maliana-Bobonaro. Atividade ne’e realiza iha Salaun Konferensia Centro Chega! Antigu Comarca Balide-Dili.
Objetivu prinsipal husi kompetisaun sertame ne’e nu’udar forma ida atu motiva estudante sira aprende istoria ne’ebé akontese iha pasadu hodi hametin nasionálizmu no patriotizmu no sai sidadaun di’ak mak sai sidadaun ne’ebé hakribi violensia hodi kontribui ba paz iha sosiedade.
Objetivu seluk mak, nu’udar forma ida atu disemina narativu istóriku sira ne’ebé prezerva ba publiku liu-liu estudante sira atu hatene no aprende istória hodi banati no larepete hahalok sira ne’ebé akontese iha pasadu. Tanba ne’e, kompetisaun sertame nu’udar parte ida mos husi programa memorializasaun integradu ne’ebé hatete: atu prezerva memoria istóriku liu husi arkiva no determina narativa sira ba publiku. Atu fasilita prosesu komprensaun komum kona-ba politika no programa sira oinsa mak utiliza memoria istoriku sira. Tanba istoria no memoria sai referensia ba estudante sira atu aprende liu-liu oinsa mak uza dokumentus narativu istórik sira hodi kontribui ba justisa no paz iha Timor-Leste.
Kompetisaun sertame nu’udar atividade extra kurikular ne’ebé Centro Chega! parseria ho Ministeriu Edukasaun (ME) realiza tinan-tinan iha ámbitu komemorasaun loron istóriku sira. Iha tinan 2024 Centro Chega! liu husi Divizaun Edukasaun no Formasaun (DEF) kontinua realiza atividade sertame iha ambitu komemorasaun loron proklamasaun independensia Timor-Lete ba dala-49, ne’ebé sei akontese iha loron 28 Novembru 2024.
Atividade sertame hala’o hodi hatan mos ba atribuisaun knar husi dekretu lei no. 48/2016 ne’ebé dehan, contribuir, no âmbito das suas competências, para a educação civica, formação e metodologias de ensino no que se refere à historia de Timor-Leste no periodo de 1974 e 1999 e aos direitos humanos, promover a continuidade da disseminação e socialização do relatório Chega! e outros istrumentos de divulgação produzidos pela CAVR e pela CVA.
Atu fo hanoin katak, oras ne’e Ministeriu Edukasaun (ME) integra ona konteudu husi relatóriu final Comissão de Acolhimento Verdade e Reconsiliação (CAVR)-Chega! iha kurikulu nasionál iha Ensinu Baziku no Ensinu Sekundariu Jerál sira. Ida ne’e hatudu katak iha ona progresu di’ak ba ita nian istória luta iha prosesu aprendisajen nian.
(Media CNC)