Dili – loron 10 Juñu 2021, Centro Nacional Chega! I.P. hamutuk ho Komisaun Organizadora husi OPMT no Palasiu Prezidensiál organiza ona Komemorasaun Loron Levantamentu Marabia 10 Juñu 1980 ba dala-41, no lansamentu Livru “Buibere Hamriik Ukun Rasik-An” no Kondedokasaun Orden Timor-Leste ba Saudoza Merita Alves “Bi Kiak” iha salaun Nobre Repúblika Popular China, Palasiu Prezidente Nicolau Lobato, Bairo Pite-Dili.
Komemorasaun ba eventu boot tolu ne’e lidera diretamente husi Exelénsia Prezidente Repúblika Dr. Francisco Guterres “Lú-Olo” no partisipa husi Eis Titular sira, Membru Parlamentu, Membru Governu, Prezidente Tribunal Rekursu, Veteranu sira, Sovrevivente Levantamentu Marabia no Familia sira, Asosiasaun Vítima, Sosiedade Sivíl no Konvidadu sira.
Durante komemorasaun ne’e, Centro Nacional Chega! servisu hamutuk ho RTTL hodi halo trazmisaun direta liu husi Programa Talkshow “Chega! ba Esperansa” hodi ko’alia kona-ba komemorasaun levantamentu Marabia 10 Juñu 1980, Lansamentu Livru no Kondekorasaun. Talkshow ne’e nia oradór mak Diretór Ezekutivu Centro Nacional Chega! I.P. Sr. Hugo Maria Fernandes no Sekretaria Jeral Interina OPMT, Sra. Florentina Smith no modera husi Sr. Gaudencio Sousa.
Iha Talkshow, Diretór Centro Nacional Chega! I.P. Sr. Hugo Maria Fernandes hateten, komemorasaun levantamentu Marabia 10 Juñu 1980 ba dala 41, inklui lansamentu livru no kondekonrasaun ne’e importante tebes tanba ne’e jerasaun foun sira presiza aprende. Tanba iha levantamentu ne’e la’os mane de’it, maibé envolve mos husi feto sira nian.
Nune’e liu husu lansamentu livru “Buibere Hamrik Ukun Rasik-an”, Centro Chega! sei servisu hamutuk ho Ministeriu Edukasaun atu hatama istória feto nian ba iha kurikulu hodi sai materia ba estudante sira atu aprende.
Nune’e mós Sekretaria Jeral Interina OPMT, Sr. Florentina Smith dehan, OPMT hamutuk ho komisaun peskiza no elaborasaun sei servisu hamutuk ho Centro Chega! hodi kontinua halo diseminasaun ba istoria livru “Buibere Hamrik Ukun Rasik-an”, ba joven sira atu nune’e sira bele hatene istoria.
Tanba OPMT nia servisu la’os to’o iha ne’e de’it, maibe sei servisu hamutuk ho Centro Chega! no entidade sira seluk atu fahe informasaun kona-ba istoria feto nian jerasaun foun hahú husi nivel nasional to’o iha nivel lokal sira.
Enkuantu Prezidente Repúblika Dr. Francisco Guteres “Lú-olo” iha nia intervesaun hateten, lansamentu livru ida ne’e atu haklaken no fó valorizasaun feto nia dedikasaun aten brani, sakrifisiu no determinasaun iha prosesu luta libertasaun nasional.