Dili – Iha loron Segunda-feira, 09 Maiu 2022, Centro Nacional Chega!I.P servisu hamutuk ho GIZ-SAUP (Deutsche Gesellschaft für Internationale Zusammenarbeit – the Southeast Asian University Partnership) no Asosiasaun Jornalista Timor Lorosa’e (AJTL) oferese fórmasaun jornalizmu ba paz ba estudante universitariu sira hamutuk na’in 25.
Objetivu hosi fórmasaun ne’e mak nudar parte ida hosi programa transmisaun memória interjerasional (hatutan memória) ba estudante universitariu sira atu aprende kona-ba istória Timor-Leste liuhosi intervista sobrevivente sira no grava sira nia istória ba públiku.
Programa fórmasaun ne’e la’o durante loron sanulu (10) hahú hosi (9-18 Maiu 2022) no estudante sira sei aprende kona-ba istória Timor-Leste, Dezenvolve abilidade jornalizmu ba paz, abilidade teknika entrevista, inklui oinsá halo produzaun ba video. Depois remata fórmasaun, estudante sira sei tun terreñu hodi halo entrevista sobrevivente sira iha munisipiu Liquiça durante loron 5 hahú (23-27 Maiu 2022).
Iha intervensaun, Asesor GIZ iha Centro Chega!, Mitjo Vaulasvirta infórma, fórmasaun jornalizmu ba paz ne’ebé Centro Chega! hamutuk ho GIZ-SAUP no AJTL oferese hanesan instrumentu importante ba konstrusaun dame iha Timor-Leste.
Tanba liuhosi programa formasaun jornalizmu ba paz hanesan oportunidade di’ak ba estudante sira aprende kona-ba istória Timor-Leste no fahe esperensia ba publiku liuhosi produzaun video ne’ebé sei hala’o durante loron 5 iha munisipiu Liquiça.
Programa formasaun jornalizmu ba paz la’os atu rezolve problema vitima sira nian iha Timor-Leste maibé programa ne’e fó ba vitima sira nudar oportunidade ba sira, ko’alia kona-ba sira nia istória no fahe sira nia esperensia ba publiku Timor-Leste atu nune’e publiku bele hatene.
Prezidente AJTL, Zevonia Vieira haktuir, AJTL hamutuk ho Centro Chega! no GIZ-SAUP fasilita formasaun jornalizmu ba paz ba estudante universitariu sira tanba hakarak atu reduz konflitu no violasaun direitus umanus iha Timor-Leste.
Tanba programa formasaun jornalizmu ba paz ne’e atu hanorin estudante sira halo kobertura kona-ba istória Timor-Leste, oinsá defende ema vulneravel sira hanesan feto no labarik sira ne’ebé mak iha tempu pasadu sai vitima ba konflitu.
Agradese ba Centro Chega! no GIZ-SAUP ba programa formasaun jornalizmu ba paz ne’e atu bele tulun estudante sira bele komprende kona-ba jornalizmu ba paz no oinsá halo produsaun video ba sobrevivente nia istória.
Diretór Ezekutivu Centro Chega!, Hugo Maria Fernandes husu ba estudante sira atu aproveita oportunidade formasaun jornalizmu ba paz ne’e ho didi’ak atu bele hetan rezultadu di’ak tanba Centro Chega! iha planu sei publika rezultadu produsaun ba iha media.
Media Chega!