Maubisse – Atividade formasaun kona-ba jornalizmu ba paz (Peace Journalism) ne’ebé oferese hui Centro Nacional Chega!I.P no Conselho Imprensa (CI) ne’e di’ak tebes tanba bele aumenta koñesimentu kona-ba paz.
Tuir Jornalista Radio Komunidade Covataroman Sancho Nahac, atividade formasaun Peace Journalism ne’ebé oferese husi CNC no CI di’ak tebes no liuhosi formasaun ne’e bele aumenta sira nia koñesimentu oinsá atu kontribui ba paz.
“Ha’u senti formasaun ne’e importante no benefisiu ba média liu-liu jornalista sira. Liuhosi formasaun ne’e bele hatur lolos informasaun ne’ebé sira publika ne konsidera lori paz ba publiku em jeral, liliu ba komunidade sira iha área rural”, dehan jornalista ba Media Chega! iha salaun Paroquia Imaculado de Maria Maubise-Ainaro, Sexta-feira (31/03/2022).
Relasiona ho formasaun ne’e, jornalista mós Rekomendasaun ba CNC no CI karik bele lori formadór sira área jornalizmu ba paz husi rai liur, atu bele mai fahe sira nia expriensia ne’ebé avansadu liu. Tanba materia ne’ebé hetan iha formasaun durante loron 2 iha Maubessi konsisera hanesan materia formasaun baziku iha area Jornalizmu ba Paz nian.
Nune’e mós jornalista husi média online Neon Metin, Silvino da Costa Freitas konsidera, formasaun jornalizmu ba paz ne’e importante no bele ajuda nia hodi halo kobertura kona-ba paz.
“Bele ajuda hakerek notisia tuir jornalizmu ba pas nian, no espera bele ajuda ita iha área jornalizmu ba pas,” dehan Silvino.
Fasilitadór, Alberico da Costa hateten, formasaun Peace Journalism ne’e realiza tanba CI halo kooperasaun di’ak ho CNC, no liuhosi formasaun ne’e atu mellora abilidade no kompetensia ne’ebé jornalista Timor-oan sira.
“Materia ne’ebé ohin kolega sira hetan, ida ne’e bele sai referensia ba ita boot sira. Materia sira ne’ebé aprende ligasaun kona-ba paz oinsá ita kontibui ba estabilidade nasaun ninia liu-liu jornalizmu ba paz”, nia informa.
Aproveita buat ne’ebé ita boot sira estuda ona ba ita boot sira nia servisu oinsá ita boot sira ko’alia ba ita boot sira nia redasaun para aplika materia ne’ebé ita boot sira hetan ona.
Reprezentante Diretór Ezekutivu Centro Chega!, Gaudencio Soares Souza reforsa, materia treinamentu ne’ebé mak fo husi CNC no CI konsidera formasaun ne’e hanesan oportunidade di’ak ba kolega sira tanba la’os hotu-hotu hetan.
Atu kria paz ba jornalista sira lalais, maibé atu kria violentu no konflitu ne’e mos lalais. Maibé ida ne’e opsaun depende ba ita hotu. Depende ba ita hili ida ne’ebé paz ka konflitu. Se konflitu pasiensia ita nia dezenvolvimentu sei hakdasak tanba jornalista sira barak liu ba konflitu. Maibé se paz ida ne’e di’ak liu tanba baibain ema dehan paz no dame ne’e furak ema hotu-hotu la’o livre halo servisu ho diak moris hakmatek no moris iha ambiente paz.
“Hau espera katak kolega sira hotu-hotu materia ida ne’ebé mak ita boot sira simu ona bele tulun ita boot sira nia kareira. Kareira husi jornalizmu no kareira husi jornalizmu ba paz iha ita boot sira nia vida”, nai esplika.
Enkuantu, Centro Nacional Chega!I.P, Da Memória à Esperança (Centro Chega!) hamri’ik nu’udar institutu públiku ida ne’ebé estabelese ho dekretu Lei no. 48/2016 no tutela direitamente ba Primeiru Ministru. Centro Chega! nia vizaun mak: “Sosiedade ida ne’ebé inkluzivu, la repete istória passadu nian, moris iha dame, no respeitu ba direitus umanu”. Centro Chega! nia misaun mak: “Harii sentru Pós-konflitu ne’ebé prezerva memória passadu nian hodi promove direitus no valór umanu, harii parseria nasionál no internasionál hodi reforsa rede servisu sira atu implementa rekomendasaun sira husi Relatóriu Final Comissão de Acolhimento, Verdade e Reconciliação (CAVR)-Chega! No Comissão da Verdade e Amizade (CVA) – Per Memoriam Ad Spem, sira ne’ebé relevante”.
Media Chega!