Díli – (09 Fevereiru 2023), Profesor Eskola Sekundária Jerál Katólika Seminar Menor Nosa Senora de Fatima Balide apresia Centro Nacional Chega!I.P nia servisu ba prezervasaun istória pasadu.
Centro Nacional Chega!I.P, Da Memória à Esperança (Centro Chega!I.P) hamri’ik nu’udar institutu públiku ida ne’ebé estabelese ho dekretu Lei no. 48/2016 no tutela direitamente ba Primeiru Ministru. Centro Chega! nia vizaun mak: “Sosiedade ida ne’ebé inkluzivu, la repete istória passadu nian, moris iha dame, no respeitu ba direitus umanu”.
Centro Chega! nia misaun mak: “Harii sentru Pós-konflitu ne’ebé prezerva memória passadu nian hodi promove direitus no valór umanu, harii parseria nasionál no internasionál hodi reforsa rede servisu sira atu implementa rekomendasaun sira husi Relatóriu Final Comissão de Acolhimento, Verdade e Reconciliação (CAVR)-Chega! No Comissão da Verdade e Amizade (CVA) – Per Memoriam Ad Spem, sira ne’ebé relevante”.
Ho misaun no vizaun ne’e, Profesor Gabriel Soares de Carvalho esplika, prezervasaun istória pasadu ne’e importante tebes oinsa atu hanorin jerasaun foun sira atu bele hatene istória tanba jerasaun foun barak mak seidauk hatene istória pasadu.
“Istória pasadu presiza halo prezervasaun, no hanorin ba jerasaun foun sira liu hosi prosesu aprendisajen iha eskola, atu estudante sira bele hatene, tanba estudante barak mak seidauk hatene istória pasadu”, dehan Gabriel ba Media Chega! iha Antigo Comarca Balide-Dili.
Nia haktuir, atividade Chega! Tour ne’ebé Centro Chega! hamutuk Ministeriu Edukasaun Juventude no Desportu (MEJD) no apoiu hosi UNESCO halo ne’e importante tanba oinsa lori profesor sira hodi haree fatin istóriku sira.
Buat ida ne’ebé importante no lori sira aprende hosi atividade Chega! Tour mak haree fatin istóriku sira hanesan fatin masakre, fatin konsentrasaun no fatin torturasaun sira iha Munisípiu Díli.
Fatin sira ne’e uluk kastigu ema, oho ema, dadur ema no sira seluk tan mak hanesan sítiu istóriku Polres Dili (Agora pusat kebudayaan), Eis KODIM Díli (Casa Europa), Toko Lay, Sang Tai Hoo, Postu SGI (Satuan Gabungan Intelijen), Sede Anterior Polisia Militar Portugués (Atúal Sede UDT), Ponte Kais Dili, Câmara Eclesiástica no Eis Departementu Sosiál Portugues (Atual Kampus FaSPol).
Hosi vizita ne’e partisipa hosi Profesor sira hamutuk na’in 100 ne’ebé mai hosi Munisípiu Atauro no Munisípiu Díli.
“Pesoalmente hanesan jerasaun foun apresia ba konservasaun CNC nian, bele halibur informasaun hodi halo identifíkasaun ba fatin refere”, dehan Gabriel.
Durante halo viajen iha Kapital Dili, haree fatin istóriku sira ne’e, maibé lahatene, fatin istóriku sira ne’e, uluk uza ba saida nian. Entaun depois CNC esplika mak sira foin hatene fatin, ne’e, istóriku sira. Entaun ida ne’e hanesan esperensia foun ida.
“Tanba ne’e planu ba futuru sei lori estudante sira hodi vizita fatin istóriku sira ne’ebé Centro Chega! halo prezervasaun. Ita ko’alia kona-ba istória ne’e importante tanba buat hotu hahú, mai hosi istória. Istória nu’udar aliserse ida ba dezenvolvimentu nasaun no jerasaun foun sira nia konstrusaun”, nia tenik.
Nia mós sujere ba estudante sira mai vizita Centro Chega! hodi haklean-tán koñesimentu kona-ba istória pasadu no sai lisaun foun hodi larepere iha futuru.
Media Chega!.