Dili – Foinsa’e Katolika Paroquia Sagrado do Coração de Jesus Becora (FOSKABE) rekomenda ba Centro Nacional Chega!I.P atu halo diseminasaun informasaun kona-ba istória Timor-Leste ba joventude sira iha teritóriu Timor laran tomak.
Rekomendasaun ne’e hato’o husi , Xefe FOSKABE, Floriano Pereira Roben hafoin halo vizita iha fatin istóriku Antigo Comarca Balide-Dili, hodi haree ezibisaun istóriku sira hahú husi ezibisaun prizaun no prizoneiru polítiku, ezibisaun akontesimentu 1974-1999, ezibisaun CAVR, ezibisaun apoiu komunidade internasionál, ezibisaun direitus umanus no sela nakukun.
Tanba Centro Nacional Chega!I.P nu’udar institutu públiku ida ne’ebé estabelese ho dekretu Lei no. 48/2016. Centro Chega! nia vizaun mak: “Sosiedade ida ne’ebé inkluzivu, la repete istória passadu nian, moris iha dame, no respeitu ba direitus umanu”. No Centro Chega! nia misaun mak: “Harii sentru Pós-konflitu ne’ebé prezerva memória passadu nian hodi promove direitus no valór umanu, harii parseria nasionál no internasionál hodi reforsa rede servisu sira atu implementa rekomendasaun sira husi Relatóriu Final Comissão de Acolhimento, Verdade e Reconciliação (CAVR)-Chega! No Comissão da Verdade e Amizade (CVA) – Per Memoriam Ad Spem, sira ne’ebé relevante”.
Atu implementa atividade ne’e mak Centro Chega! presiza servisu hamutuk ho parseiru sira mak liuhusi autoridade lokál no konfiksoes relijiozu sira iha nivél munisípiu atu implementa. Ita hatene katak istória importante maibé kuandu joventude nudar ai-rin ba nasaun mak lahatene istória, mak ita nia identidade sei lakon.
“Timor-Leste nia identidade mak istória luta ba ukun rasik-an, joventude tenke hatene istória, se joven mak lahatene istória mak ita konsidera joventude lakon nia identidade hanesan Timoroan,” dehan Xefe FOSKABE, Floriano ba Media Chega! iha Antigo Comarca Balide-Dili, Sabadu (12/11/2022).
Xefe FOSKABE haktuir, ekipa FOSKABE vizita Centro Chega! hodi selebra loron Nasionál Juventude Timor-Leste nian ba dala-17 no komemorasaun masakre Santa Cruz ba dala-31 ho tema “Kaer Metin Valores Juventude Rezistensia nian Hamutuk Ita Kontribui Nasaun ho Esperansa ba Futuru”.
Objetivu husi vizita ne’e atu lori joventude sira atu hatene no koñese didi’ak istória Timor-Leste nian funu hahú husi ne’ebé? to’o iha ne’ebé? no sá mak ita hetan ona iha ukun rasik-an ne’e.
Totál membru FOSKABE ne’ebé partisipa vizita Antigo Comarca-Balide hamutuk ema na’in 160 kompostu husi Bairo Paroquia Becora, Bairo Becora Centro, Bairo Because Leten, Bairo Becora Leten, Bairo Lagoa, Bairo Colam Vitoria, Soldadu ba Cristo, Bairo Beribido, Bairo Payol no seluk tan.
“Durante vizita, hau rasik mós mataben nakonu wainhira tama iha prizaun nia laran. Nunka esperensia iha ita nia moris tomak. Rona maibé lahatene no ohin hau sente no haree rasik katak uluk joven sira terus fo-an de’it ba ita nia ukun rasik-an,” dehan Floriano.
Dalariza Neves Amaral membru FOSKABE informa, nia sente kontente tanba sira bele mai aprende fila fali istória uluk ne’ebé mak ita nia juventude sira halo iha tempu pasadu. Sira sente triste tanba juventude sira sakrifika sira nia-an ba mate-tán defende ukun rasik-an.
“Husi vizita ne’e hau aprende, hau iha ona koñesimentu oituan kona-ba istória liu-liu iha sela nakukun, wainhira hau tama ba ne’ebá hau aprende buat barak, hau bele hetan motivasaun husi ita nia maun Leo David dehan katak, mate hau bele mate, maibé husik Timor mak hau labele,” Dalariza haktuir.
Nia mós fó hanoin ba joventude sira katak, luta joventude iha tempu agora mak, eskola no estuda atu nune’e bele sai matenek hodi dezenvolve ita nia nasaun.
Media Chega!