Dili – Estudante hosi Universidade da Paz (UNPAZ), Fakuldade Ciénsia Sosiais no Humaniora (FCSH), Departementu Administrasaun Publika rekomenda ba Centro Nacional Chega!I.P atu fahe materia istória Timor-Lete ba eskola sira iha Timor laran tomak.
Tanba tuir, Estudante UNPAZ, Pio da Costa Sarmento katak, eskola sira hahú hosi eskola Primaria, Pre-sekundaria, Sekundaria no Universidade seidauk iha materia espesifiku kona-ba istória Timor-Leste.
Tanba ne’e Centro Chega! presiza servisu hamutuk ho Ministériu Edukasaun Joventude no Desportu (MEJD) atu fahe materia ba eskola sira hodi hanorin.
“Hau rekomenda ba Chega! servisu hamutuk ho Ministériu Edukasaun Juventude no Desportu (MEJD) bele fahe modul ka livru ne’ebé Chega! prepara, fahe ba eskola sira hodi hanorin”, dehan Estudante ba Media Chega! iha Antigu Comarca Balide-Dili, Kinta-feira (07/04/2022).
Ohin loron Timor-Leste hamrik sai nasaun ida livre no hetan ona nia independensia, maibé jerasaun foun presiza aprende istória kona-ba luta ukun rasik-an nian. Ukun-an ida ne’e ema barak mate, hetan torturasaun, hetan violasaun seksual tanba de’it liafuan ikun rasik-an.
Tan ne’e, ba sira nia “Sakrifisiu ne’ebé mak sira halo iha tempu passadu ita jerasaun foun dignifika sira. Ita merese duni atu dignifika no valór ba sira”. No aprende sira nia istória atu ba futuru labele sai bainaka ba ita nia istória rasik.
“Hau sente kontente tanba Chega! hola papál importante halo prezervasaun ba fatin ida ne’e, konserva didi’ak istória atu jerasaun foun sira mai aprende no peskiza kona-ba situasaun ne’ebé akontese iha pasadu”, agradese nia.
Nasaun ida hetan independénsia sempre iha istória no istória importante tebes atu ita aprende ba oin.
Estudante UNPAZ, Salustiano de Sales sente orgullu, mai vizita Centro Chega! liu hosi vizita bele aprende no hatene kona-ba istória ne’ebé mak akontese iha tempu pasadu.
Durante vizita iha Centro Chega!, “Hau aprende istória lubuk ida, hau nia rekomendasaun ba Centro Chega! atu fó nafatin oportunidade ba kolega sira no joven sira bele mai lee istória sira, hodi nune’e sira bele hatene”,.
Centro Nacional Chega!I.P, Da Memória À Esperança (Centro Chega!) hamri’ik nu’udar institutu públiku ida ne’ebé estabelese ho dekretu Lei no. 48/2016 no tutela direitamente ba Primeiru Ministru. Centro Chega! nia vizaun mak: “Sosiedade ida ne’ebé inkluzivu, la repete istória passadu nian, moris iha dame, no respeitu ba direitus umanu”. Centro Chega! nia misaun mak: “Harii sentru Pós-konflitu ne’ebé prezerva memória passadu nian hodi promove direitus no valór umanu, harii parseria nasionál no internasionál hodi reforsa rede servisu sira atu implementa rekomendasaun sira husi Relatóriu Final Comissão de Acolhimento, Verdade e Reconciliação (CAVR)-Chega! No Comissão da Verdade e Amizade (CVA) – Per Memoriam Ad Spem, sira ne’ebé relevante”.
Media Chega!