Dili-Estudante Universidade da Paz (UNPAZ) husi Fakuldade Ciénsia Sosiais Humaniora (CSH), Departementu Administrasaun Públika hamutuk ema na’in 36 vizita Centro Chega! hodi haree ezibisaun istóriku kona-ba istória luta Timor-Leste nian ba ukun rasik-an.
Iha vizita ne’e, fasilita husi Ofisiál Edukasaun no Formasaun, Flamina Freitas Belo hodi introduz uluk kona-ba Centro Chega! depois lori sira ba haree istória hahú husi Sala CAVR, Sala Direitus Umanus, Sala arkivu no Sela nakukun (fatin Comarca) no taka ho refleksaun.
Hafoin remata vizita, Estudante, Inacia X. de Fatima Colo informa katak, objetivu husi vizita ne’e atu buka hatene kona-ba istória luta povu Timor-Leste nian ba independénsia. Tanba independénsia ne’ebé ohin loron ema hotu goja liu hosi terus no susar oioin.
“Iha vizita ne’e ha’u aprende kona-ba istória Timor-Leste hahú husi kolonializmu Português mai to’o iha invazaun Indonézia”, dehan Inacia ba media Chega! iha Antigo Comarca Balide, Dili, Segunda (14/03/2022).
Ho istoria ne’ebé iha, hanesan jerasaun foun hakarak rekomenda ba Centro Chega! tenke fahe istória ne’e ba joven no estudante sira atu sira bele hatene tanba joven no estudante sira barak seidauk hatene istória Timor-Leste nian.
Estudante F’valentino Ximenes agradese ba Centro Chega! tanba fasilita ona sira mai vizita iha fatin istóriku ida ne’e. Hanesan joven sente kontente tebes tanba foin primeira vez vizita mai iha ne’e hodi aprende kona-ba istória.
Media Chega!