Dili – (08 Novembru 2024), Estudante Finalista ‘Los-Viajantes’ hamutuk nain 120 husi Instituto São João de Brito kompostu Departementu Matematika, Lingua Portuguêsa, Lingua Inglesa no Edukasaun Relijiaun organiza no selebra materia edukasaun ba paz ho tema “Haree dame no rekonsiliasaun iha buat hotu-hotu. Promove dame no rekonsiliasaun liu husi arte”.
Selebrasaun ne’e, prenxe ho atividade aprezentasaun drama liga ba dame, aprezentasaun musika, aprezentasaun poezia ligadu ba jornada moris ba dame, aprezentasaun dansa, pinta, spoth foto no faan hahan. Atividade ne’e realiza iha Fundasaun Oriente no partisipa husi Ministeriu Ensinu Superior Siensia no Kultura (MESSK), Centro Chega!I.P, Reitór ISJB no estudante sira.
Iha biban ne’e, Diretór Ezekutivu Chega!, Hugo Maria Fernandes, apresia ba inisiativa estudante finalista husi ISJB sira nia ba atividade aprezentasaun arte musika, poezia, drama no teatru.
Maria Cortereal da Silva nu’udar Komisaun Organizadora esplika, objtivu husi atividade ne’e mak atu selebra materia edukasaun ba paz, esplora asuntu paz no rekonsiliasaun liu husi aprezentasaun arte no mos halo fun risen ba atividade yudisium no graduasaun nian iha tempu badak nia laran.
“Atividade ne’e realiza hanesan selebrasaun ba ami nia disiplina materia edukasaun ba paz. Atividade ne’e hala’o tanba rezultadu husi kooperasaun servisu entre Centro Chega! ho ISJB ba iha implementasaun materia edukasaun ba paz ne’ebé hanorin ona iha eskola ISJB”, dehan Maria ba media CNC iha Fundasaun Oriente.
Alende ne’e, Prezidente Komisaun Organizadór nu’udar mos estudante finalista, Basilio Soares Maia reforsa, materia edukasaun ba paz ne’e importante oinsa tulun joven sira valoriza sira nia-an no valoriza sira nia moris hanesan joven.
Ba oin tenke iha kontinuasaun atu promove nafatin joven sira hodi esforsu hodi luta kona-ba sira nia moris. Nia fo Exemplu, mundu ohin loron hasoru buat barak kona-ba problema, oho malu, sona malu no hana malu no tuda malu ne’e boot tebes.
“Ami agradese tebes ba iha Centro Chega! ho instituto São João de Brito ne’ebé mak kolabora ho Ministeriu Ensinu Superior hodi bele hariku liu tan edukasaun ba paz hodi tulun ami joven sira hodi bele hatene oinsa valoriza ami nia moris”, nia agradese.
(Media CNC)