Dili, 19 Dezembru 2022 – Centro Nacional Chega!I.P (CNC) liuhusi Divizaun Dezenvolvimentu Institusional no Rekursu Umanu (DDIRU) fasilita formasaun kona-ba Jestaun Rekursu Umanu ba funsionáriu Chega!. Formasaun ne’e la’o durante loron tolu (3), hahu husi loron 19, 20, 21 Dezembru 2022.
Funsionáriu hirak ne’e kompostu husi, Gabinete Apoiu Orgaun Centro Chega! (GAOCC), Divizaun Relasaun Externa, Komunikasaun no Advokasia (DREKA), Divizaun Edukasaun no Formasaun (DEF), Divizaun Solidariedade ba Sobrevivente (DSS), Divizaun Peskiza no Arkivu Istóriku (DPAI), Divizaun Finansas no Operasional (DFO) no Divizaun Dezenvolvimentu Institusional no Rekursu Umanu (DDIRU) hamutuk ema na’in 20.
Alende ne’e, partisipante mós funsionáriu husi Asosiasaun Eis Prizoneiru Politiku (ASEPPOL) Muzeum Rezistensia Munisipiu Covalima inklui funsionáriu husi projetu programa Países Africanos de Língua Oficial Portuguesa (PALOPS).
Formasaun ne’e, abertura husi Diretór Ezekutivu Centro Chega!, Hugo Maria Fernandes, konsidera, formasaun ida ne’e importante tebes ba funsionáriu Centro Chega! atu partisipa ho maximu hodi bele aumenta koñesimentu.
“Hau hanoin formasaun ida ne’e importante, tanba durante ne’e ema haree rekursu umanu orsida kontrola time sheet, kontrola pagamentu ou lisensa,” dehan Diretór iha abertura formasaun ne’ebé realiza iha sala Biblioteka, Antigo Comarca Balide-Dili.
Nia haktuir, liuhusi formasaun ida ne’e bele aumenta funsionáriu sira nia koñesimentu oinsa atu bele koloka funsionáriu sira tuir deskrisaun servisu iha área espesifiku ne’eéb tuir nia abilidade.
“Hau hanoin aspeitu boot liu instituisaun metin tanba nia rekursu sira ne’ebé bein alokadu, iha koñesimentu ne’ebé mak di’ak iha área ne’ebé servisu ba, iha ne’e hanesan tulang punggung instituisaun ninia,” nia tenik.
Instituisaun iha ho ema ne’ebé mak di’ak, ho prosedimentu sira ne’ebé mak iha fatin, maibé kuandu laiha formasaun koñesimentu klean kona-ba servisu ida ne’e nian ita iha tendensia haree ho matan sorin de’it.
“Hau husu ba kolega sira ita iha oportunidade di’ak atu hasa’e ita nia koñesimentu ba iha asuntu ida ne’e. Obrigado ba DDIRU tanba organiza ona kolega sira partisipa liu-liu formadora, ami fiar katak ho ita boot nia matenek bele fo klareza ba ami,” Diretór agradese.
Media Chega!