Dili – Centro Nacional Chega!I.P liu hosi Divizaun Dezenvolvimentu Institusional no Rekursu Umanu (DDIRU) oferese formasaun lideransa ba funsionáriu Chega! hamutuk ema na’in 19 kompostu hosi Ofisiál, Xefe Departamentu no Diretór Divizaun sira. Formasaun ne’e, halo durante loron tolu (3), hahú iha loron Kuarta-feira to’o Sexta-feira, 09-11 Marsu 2022 no fasilitadór ba formasaun mak Sr. Fernando Antonio da Costa.
Diretór Ezekutivu Chega!, Hugo Maria Fernandes husu ba funsionáriu Chega! ne’ebé mak partisipa ona formasaun kona-ba lideransa durante loron tolu, atu implementa koñesimentu no esperensia ne’ebé hetan ba iha servisu lorloron.
Hugo haktuir, Centro Chega! liuhosi DDIRU halo formasaun lideransa ba funsináriu sira tanba kada divizaun iha planu asaun saida mak atu halo, entaun formasaun lideransa ne’e atu bele ajuda oinsá deal ema seluk atu implementa programa no atividade sira.
“Ita halo formasaun lidership ne’e, ita atu hatene modellu sira ne’e para ita atu deal ho ema ruma”, dehan Hugo iha enseramentu formasaun lideransa ne’ebé hala’o iha Salaun Konferensia Centro Chega! Antigo Comarca Balide, Dili, Sexta-feira (11/03/2022).
Entretantu, Diretóra DDIRU, Maria Arminda informa hateten Objetivu hosi formasaun mak atu hasa’e kapasidade no koñesimentu funsionáriu Chega! nian atu bele hala’o servisu ba instituisaun Centro Chega! ho di’ak liu tan.
Ho formasaun sira ne’e, saida mak ita aprende ne’e, bele lori ita implementa iha ita nia servisu lorloron nian no materia ne’ebé aprende ita presiza buka aprende liutan hodi haklean koñesimentu.
Formasaun ne’e fó ba funsionáriu CNC nian, bazeia ba ita nia planu estratéjiku, ita hatene katak Centro Chega! sai sentru ba dame no direitus umanus. Atu atinji ita nia objetivu, ita presiza hasa’e kapasidade rekursu umanu atu bele dezenvolve instituisaun ne’e la’o di’ak liu tan.
Tanba iha tinan 2022, tuir planu asaun annual DDIRU nian katak ita nia formasaun ba dezenvolve kapasidade funsionáriu CNC nian kona-ba lideransa no iha mós asuntu sira seluk tuir nesesidade servisu instituisaun nian.
Diretór Divizaun Solidariedade ba Sobrevivente (DSS), Nelson Agusto X. Miranda sente kontente tebes hodi partisipa formasaun ne’e tanba formasaun ne’e di’ak tebes. Formasaun ne’e tuir duni nesesidade CNC nian liu-liu ba jestór sira oinsá atu dirije, lidera no orienta hodi hala’o servisu ekipa ho di’ak.
Ofisial Edukasaun no Formasaun iha Divizaun Edukasaun no Formasaun (DEF), Flamina Freitas Belo dehan, foin primeiravez partisipa formasaun lideransa no nia sente kontente tebes. Formasaun ida ne’e kapas no kapasita di’ak liutan. Liuhosi formasaun ne’e bele aprende liu tan saida mak lider no maneira lideransa no hatene espiritu lideransa nian.
“Iha formasaun ida ne’e, ha’u gosta liu tipu lideransa transformasional tanba tipu ida ne’e oinsá mak atu motiva ema uza nia vizaun no oinsá mak lidera iha fatin ida ka organizasaun ida atu bele enkoraja ema seluk atu bele hatene di’ak liu tan”, nia informa.
Media Chega!