Dili – (30 Jullu 2024), Centro Nacional Chega! Instituto Publiku (CNC I.P) koopera hamutuk ho GIZ-SAUP (Deutsche Gesellschaft für Internationale Zusammenarbeit – Southeast Asian University Partnership for Peacebuilding) fo formasaun ToT (Training of Trainers) ba dosente na’in 12 husi instituisaun ensinu superior 7 kompostu Universidade Nacional de Timor Lorosa’e (UNTL), Universidade Dili (UNDIL), Universidade Oriental Timor-Leste (UNITAL), Instituto Superior de Filosofia e de Teologia (ISFIT), Instituto São João de Brito (ISJB), Universidade da Paz (UNPAZ) no Universidade Catolica Timorense (UCT).
Formasaun la’o durante loron 4, fasilita husi Dosente Universidade Coimbra-Portugal, Marisa R. Gonçalves nu’udar Membru Konsellu Asesoria Internasional Chega! no mos Diretór Asia Justice And Right (AJAR), José Luis Oliveira. Konteudu husi Moduluu Chega! foku ba área 4 hanesan, Paz no Konflitu, Istória no Memória, Direitus Umanus no Justisa Sosial no mos Justisa Tranzisional.
Diretór Ezekutivu Chega!, Hugo Maria Fernandes iha abertura formasaun esplika, formasaun ne’e importante tebes ba dosente sira tanba formasaun ne’e ho modelu ToT (Training of Trainers) katak, formasaun ida ne’e, atu forma dosente sira sai formadór ba Moduluu Chega! iha instituisaun ensinu superior idak-idak.
“Ita presiza iha formasaun ba dosente sira, depois dosente sira bele hanorin iha sira nia universidade no iha sira nia fakuldade. Aban bainrua kuandu iha interese husi universidade, sira mak sai fali formadór ba dosente sira seluk”, Diretór Hugo esplika ba media sira iha Salaun Konferensia Centro Chega! Antigo Comarca Balide-Dili.
Nia hatutan, Chega! hamutuk ho GIZ-SAUP fo formasaun ba dosente sira atu prepara sira sai futuru dosente ba iha Modulu Chega! foku ba área 4 hanesan, Paz no Konflitu, Istória no Memória, Direitus Umanus no Justisa Sosial no mos Justisa Tranzisional
Iha oportunidade hanesan, Dosente Universidade Coimbra-Portugal, Marisa R. Gonçalves nu’udar Membru Konsellu Asesoria Internasional Chega! reforsa, Modulu Chega! la’os ko’alia de’it kona-ba istória Timor-Leste, maibé ko’alia mos kona-ba oinsa istória Timor-Leste relasiona ho direitus umanus no konstrusaun dame iha Timor.
“Entaun CNC nia planu konvida hau no mos formadór sira iha Timor-Leste hodi dezenvolve kurrikulu ida ne’e ba universidade sira ne’ebé hakarak integra parte husi modulu ne’e iha sira nia kurikulu aban bainrua. Entaun ohin ita hahu formasaun ba formadór sira depois bele hatene kona-ba metodolojia, kona-ba konteudu husi modulu Chega! depois sira bele hanorin profesor universitariu sira,” nia informa.
Modulu ne’e prepara durante tinan 1 no involve husi timoroan sira. Elabora modulu bazeia ba metodolojia sentrada ba alunu sira. Iha metodolojia ativu oinsa involve estudante sira iha atividade sira hanesan vizita arkivu, vizita biblioteka. Hirak ne’e hotu oinsa estudante sira bele iha autonomia peskiza no mos iha autonomia hanoin kritiku no analitiku.
Hafoin remata formasaun, Dosente ISJB, Miguela Baress da Costa hato’o sentimentu kontente ba formasaun ne’e tanba aumenta sira nia konesimentu kona-ba modulu Chega! foku ba área 4 hanesan, Paz no Konflitu, Istória no Memória, Direitus Umanus no Justisa Sosial no mos Justisa Tranzisional.
(Media CNC)