Dili – (28 Setembru 2023), Centro Nacional Chega!I.P, (Centro Chega!I.P) asiña ona Akordu Servisu Hamutuk (ASH) ho Governu Federal Alemaña liu husi Embaixada Alemaña Rezidente Jakarta Indonézia. Objetivu husi asiña akordu ne’e mak, atu extende kooperasaun parseria Embaixada Alemaña ba Projeitu Redezenvolve Museum Antigo Comarca Balide (MAC-B) ba tinan 2 hahú husi 2023 to’o 2024 ho montante $ 442,914.01.
Diretór Ezekutivu Centro Nacional Chega!I.P, Hugo Maria Fernandes esplika, Centro Nacional Chega!I.P asiña ASH ho Governu Federal Alemaña liu husi Embaixada Alemaña Rezidente Jakarta-Indonézia ba apoiu projetu MAC-B.
“Akordu kooperasaun tinan rua, 2023 to’o 2024. Akordu ida ne’e nia konteudu mak oinsa Governu Federal Alemaña apoiu Centro Chega!I.P iha Projeitu Redezenvolve Museum Antigo Comarca Balide (MAC-B) ne’e, sai nu’udar sentru ida ba direitus umanus no istória pasadu Timor-Leste,” Diretór Chega! esplika ba jornalista sira iha Antigo Comarca Balide-Dili.
Iha fatin hanesan, Embaixadora Federal Alemaña, Ina Lepel esplika, “Ami sente kontente tebes apoiu Centro Chega!I.P tanba haree ba sira nia servisu ne’ebé importante tebes ba prezervasaun memoria pasadu”.
Maibe projetu ne’e, “ami interesadu liu tanba ho projetu ida ne’e sira bele halo aprezentasaun ida iha muzeu liu-liu atu dada jerasaun foun sira atu hatene liu kona-ba sira nia pasadu, atu aprende, atu refleta i liu-liu atu aprende kona-ba, tanba sa mak violensia iha pasadu ne’e akontese. Ida ne’e mak halo ami apoiu ba inisiativa ida ne’e liu-liu oinsa mak bele dada jerasaun foun sira mai atu aprende kona-ba kauza sira husi konflitu iha pasadu”.
Razaun fundamentál ba extensaun kooperasaun ida ne’e mak:
- Kontinua halo expozisaun permanente ida iha Muzeum Comarca-Balide ho kontiúdu jéneru nian kona-ba violasaun direitu ema nian.
- Kontinua halo instalasaun kona-ba aprendizajen interativu ba estudante Eskola Sekundáriu no Universitáriu ba premedida Muzeum Cormaca-Balide.
- Dezenvolve instrumentu ba aprendizajen partisipativa istória, direitu umanu no transformasaun konflitu, impresu no/ka halo asesu ba instalasaun aprendizajen interativu
- Instalasaun ba aprendizajen interativu kona-ba istória, direitu ema nian, no formasaun ba transformasaun konflitu nian.
- Kontinua dezenvolve teknolojia muzeum no ferramenta sira aprendizajen dizital ba istória, direitu ema nian, no rezolusaun husi konflitu iha Muzeu Comarca Balide
- Harii Jardim ba refeleasaun ba vizitante no sobrevivente sira.
Antes ne’e, Centro Nacional Chega!I.P asiña ona nota entendementu ho Embaixada Alemaña iha fulan Agostu tinan 2022 no remata iha Setembru tinan 2023. Nune’e, Centro Chega!I.P no Embaixada Alemaña asiña tan akordu atu extende tan projeitu ne’e to’o iha loron 31 Dezembru 2024.
Media Chega!.