Díli – (8 Maiu 2025), Centro Nacional Chega!.I.P organiza diskusaun temátika kona-ba Relatóriu CAVR (Comissão de Acolhimento, Verdade e Reconciliação)-Kapitulu V: Rezisténsia: Estrutura no Estratéjia. Diskusaun ne’e partisipa husi estudante no dosente sira husi Universidade Católica Timorense (UCT) São João Paulo II.
Oradór ba diskusaun ne’e mak, Eis Komisariu CAVR-Chega! no CVA (Comissão de Verdade e Amizade)/PMAS (Per Memoriam Ad Spem), Jacinto das Neves Raimundo Alves hanesan mos prizoneiru politiku iha tempu Indonézia halo aprezentasaun kona-ba “refleksaun kritika ba prespetiva aproximasaun metodolojia no fonte sira ba elaborasaun relatóriu Chega!”. Oradór II, Nuno Chayloro, halo aprezentasaun kona-ba “Kapitulu V: Rezisténsia: Estrutura no Estratéjia” no Oradora III, Josefina Moniz fahe esperensia kona-ba “partisipasaun feto nian iha luta libertasaun”.
Diskusaun tematiku ne’e, abertura husi Diretór Ezekutivu Centro Chega!I.P, Hugo Maria Fernandes no destaka pontus prinsipal kona-ba programa hatutan memória espesialmente ba diskusaun tematika kona-ba relatóriu Chega! no subliña, estudante nu’udar jerasaun foun atu aprende istória pasadu hodi larepe iha futuru. Alende ne’e, destaka asuntu rekonsiliasaun timoroan nu’udar prosesu ida ba hametin paz no estabilidade.
Profesor Universidade Católika Timorense (UCT), Tito Alexandre Mendonça hateten, apresia tebes ho diskusaun temátiku ne’e tanba nu’udar espasu ida ba estudante sira atu bele aprende kona-ba estratéjia polítika ne’ebé ita nia lider sira uza iha tempu funu hodi hasoru invazór Indonézia.
“Diskusaun ne’e importante tebes ba estudante sira oinsa mak estudante sira bele aprende no hatene kona-ba estratéjia polítika ne’ebé sira forma durante okupasaun”, dehan Profesor UCT iha Salaun Konferensia Centro Chega!I.P, antigo Comarca Balide, Kinta-feira, (08 Maiu 2025).
Profesor haktuir, ita nia prosesu luta ba ukun rasik-an la’os de’it luta armas, maibé luta envolve estrutura polítika, diplomátika no kultural ne’ebé forte. Prosesu ida ne’e sai inspirasaun ba joven liu-liu estudante sira atu hatene.
Estudante UCT, Judit Maria de Oliveira reforsa, diskusaun temátiku ne’e sai esperensia foun ba sira tanba diskusaun ne’e kona-ba relatóriu Chega! kapitulu V: Rezisténsia, Estrutura no Estratéjia no materia ida ne’e relevante tebes ho materia istória jeografia ne’ebé aprende iha eskola.
“Ami Sente kontente tebes tanba bele hetan esperensia foun husi diskusaun ida ne’e, diskusaun ne’e iha benefisiu ba ami bele koñese istória”, Estudante esplika.
Estudante UCT, João de Araújo argumenta, diskusaun temátiku ida ne’e importante tebes tanba liu husi diskusaun ne’e bele hariku liu tan koñesimentu kona-ba istória pasadu. Nu’udar jerasaun foun agradese tebes ba éroi sira nia sakrifisiu luta ba ukun rasik-an.
Enkuantu, diskusaun temátika kona-ba Relatóriu CAVR Kapitulu V: Rezisténsia, Estrutura no Estratéjia ho partisipantes hamutuk 73.
Media Chega!.