Dili – (12 Fevereiru 2026), Centro Nacional Chega!I.P servisu hamutuk ho Universidade da Paz (UNPAZ) organiza diskusaun regular ho tema “Relatóriu Chega! Kapítulu III: História do Conflito”, ne’ebé partisipa husi estudante UNPAZ hamutuk na’in 87 no realiza iha, kampus UNPAZ, Manleuana. Oradór ba ativiade diskusaun ne’e mak Nuno Rodrigues Thcailoro nu’udar peskizadór, ne’ebé ko’alia kona-ba “História do Conflito” no Jacinto R. Alves nu’udar Eis Komisáriu Comissão de Acolhimento, Verdade e Reconciliação (CAVR) no Comissão Verdade e Amizade (CVA) nian, ne’ebé ko’alia kona-ba “Reflesaun Krítika ba Poder Kolonial, Dominasaun no Rezisténsia halo Konflitu Mosu”.
Objetivu husi diskusaun mak, atu enkoraza estudante sira atu hanoin, halo refleksaun no halo diskusaun kona-ba ba sa mak akontese iha pasadu hodi refleta ba oin. Fahe informasaun ba estudante sira kona-ba istória luta no motiva estudante sira halo peskiza ba memória pasada ne’ebé prezerva ona iha Centro Chega!I.P.
Iha dikursu abertura Reprezentante Diretór Ezekutivu Centro Chega!I.P, Alexandre Ornay Pinto destaka importantia husi atividade diskusaun regular ho tema “Relatóriu Chega! Kapítulu III: História do Conflito” ne’e mak atu hasa’e estudante sira nia koñesimentu kona-ba istória pasadu luta povu Timor-Leste nian ba ukun rasik-an.
Diretór hatutan, diskusaun ida ne’e nu’udar espasu ida ba estudante sira atu aprende istória pasadu no Direitus Umanus iha periodu 1974 to’o 1999 hamutuk ho Orador importante sira ne’ebé mak uluk envolve-an iha prosesu luta ba autordeterminasaun.
Dekanu Fakuldade Ciênsias Sosiais e Humanas (FCSH) – UNPAZ, Fernando Dias Gusmão, apresia ho atividade Centro Chega!I.P nian ne’ebé organiza diskusaun regular hamutuk ho UNPAZ. Atividade ne’e importante ba estudante sira atu haklean sira nia koñesimentu.
Tanba ne’e, Dekanu FCSH husu ba estudante sira atu partisipa ativiamente iha diskusaun hodi aprende materia ne’e ho di’ak. Nia afirma, UNPAZ nafatin kolabora ho Centro Chega!I.P ba iha futuru.
Estudante UNPAZ, Agusto da Costa hato’o sentimentu kontente tanba bele partisipa iha diskusaun ne’e hodi bele aumenta nia koñesimentu liu-liu kona-ba istória pasadu luta povu Timor-Leste nian ba independensia.
Diskusaun regular hola parte atividade desenvolver biblioteca Centro Chega! iha programa memorializasaun. Programa ida ne’e atu fo oportunidade ba diskursu publiku ba harii paz, justisa no asegura katak violensia konflitu pasadu sei la akontese tan.
Entertantu, tinan ida ne’e, Divizaun Edukasaun no Formasaun (DEF) kontinua hala’o atividade desenvolver biblioteca Centro Chega! ho sub-atividade diskusaun regular ho objetivu mak atu hasa’e kompriensaun estudante no públiku nian kona-ba istória pasadu.
Media Chega!.