Ermera – (05 Agusto 2025), Centro Nacional Chega!I.P servisu hamutuk ho Ministériu Justisa (MJ) liuhosi Dirasaun Nasional Servisu Prizionais no Reinsersaun Sosial (DNSPRS) fó formasaun ba Guarda Prizional foun hamutuk na’in 30 iha Gleno, Munisipiu Ermera. Formasaun ne’e ko’alia kona-ba Istória, Diretus Umanus no Justisa Tranzitóriu. Formasaun ne’e hala’o iha Salaun Guarda Prizional Gleno, ne’ebé realiza durante loron 2 hahú iha loron 04 – 05 Agostu 2025.
Objetivu hosi formasaun ne’e mak atu introduz lisaun sira ne’ebé akontese iha pasadu ba Guarda Prizional sira atu la-repete tan violasaun direitus umanus pasadu iha tempu ukun rasik-an, promove paz, servisu imparsial no profesional nu’udar entidade públiku estadu nian.
Formadór sira ba formasaun ne’e mai husi Centro Chega!I.P no Ministériu Justisa (MJ) rasik mak hanesan, Alexandre Ornay Pinto atual Diretór Divizaun Edukasaun no Formasaun (DEF) lori materia kona-ba Istória, Direitus Umanus no Justisa Tranzitóriu. João Domingos hosi Ministériu Justisa (MJ lori materia kona-ba Rejime Ezekusaun Penal no Estatutu Guarda Prizional nian.
Hafoin remata formasaun, Centro Chega!I.P lori partisipante sira hodi vizita sítiu istóriku Eis Kodim 1637, Eis Kodim 1636 no Eis Postu Grupu Milisia Darah Merah. Objetivu hosi vizita ne’e mak hodi haree direita fatin istóriku no mos rona istória Sobrevivente, Januario Guterres nian kona-ba violasaun direitus umanus pasadu ne’ebé militar Indonézia sira halo ba nia durante iha Eis-Kodim Ermera.
Guarda Prizional foun sira ne’ebé partisipa iha formasaun ne’e, espresa sentimentu kontente no konsidera formasaun ne’e di’ak tebes tanba bele hetan materia sira kona-ba Istória, Direitus Umanus no Justisa Tranzitóriu no mos vizita ba fatin istóriku sira hodi aumenta sira nia koñesimentu.
Media Chega!.