Dili – Diretór Ezekutivu Centro Nacional Chega!I.P Hugo Maria Fernandes akompaña husi Diretór Divizaun Edukasaun no Formasaun (DEF) Vicente Borges Maia, Diretór Divizaun Solidariedade Sosiál (DSS) Nelson Seixas Miranda no Diretór Divizaun Relasaun Esterna, Komunikasaun no Advokasia (DREKA) Gaudencio Soares Souza hala’o enkontru ho Diretora Jerál Ensinu Superior e Ciência Maria Filomena Lay Guterres no Diretór Nacional do Curiculo Ensino Superior Luis Aparicio Guterres hodi husu ba Ministériu Ensinu Superior Siénsia no Kultura (MESSK) atu fó bolsu estudu ba sobrevivente vulneravel liu nia oan sira.
Bazeia ba nota entendementu ne’ebé asina entre Centro Chega! no Ministériu Ensinu Superior Siénsia no Kultura (MESSK) tinan rua liu ba, hodi integra rekomendasaun husi Relatóriu Chega! no PMAS ba iha planu asaun annual liu-liu fo oportunidade ba sobrevivente nia oan atu bele asesu eskola ida ne’ebé di’ak liu.
Diretór Ezekutivu Centro Nacional Chega!I.P Hugo Maria Fernandes informa, tinan ida ne’e MESSK loke bolsu estudu ba Timoroan sira liu husi programa ‘Rejime Hakbiit’ tanba ne’e husi Centro Chega! hakarak husu ba MESSK atu fó bolsu estudu ba sobrevivente nia oan sira atu kontinua estudu iha nivel ensinu superiór no bele mos asesu iha sentru formasaun tékniku vokasionál sira.
“Ami haree katak iha tinan ida ne’e Ministériu Ensinu Superior, Siénsia no Kultura (MESSK) hamosu pakote bolsu estudu Rejime Hakbiit. Entaun pakote ida ne’e bele fó apoiu ba sobrevivente sira nia oan”, Diretór Hugo levanta kestaun ne’e bainhira hala’o enkontru ho Diretór sira iha edifisiu MESSK, Colmera, Dili, Tersa (14/09/2021).
Tanba tuir rekomendasaun husi Relatóriu Chega! hateten katak estadu no governu fó apoiu ba vítima sira nia oan bele asesu ba nivel ensinu. Se rekomendasaun hateten ita tenke apoiu sobrevivente sira nia oan. Ida ne’e, hola parte mos iha programa reparasaun. Tuir dadus vítima no sobrevivente nia oan ne’ebé Centro Chega! rejistu hamutuk 160 no lista ne’e Centro Chega! rekomenda ona ba MESSK.
“Ita presiza deskute ne’e mak kritéria tanba ami halo rejistu to’o agora. Ita iha baze de dadus ba sobrevivente sira ne’ebé mak vulneravel liu tanba vítima hotu-hotu vulneravel, vítima balun sobrevive ona, balun deputadu, balun polítiku, balun mestre, maibé iha vítima balun mak seidauk sobrevive kontinua iha kondisaun ida vulneravel liu”, nia afirma.
Ba kestaun ne’e, Diretora Jerál Ensinu Superior e Ciência, Maria Filomena Lay Guterres esplika, MESSK iha tinan 2020 iha polítika ida hanaran Rejime Kbiit La’ek, maibé naran ne’e muda tau fali naran “Rejime Hakbiit’ hodi fó bolsu estudu ba kbiit la’ek nia oan sira.
Preokupasaun Centro Chega! nian kona-ba fó bolsu estudu ba sobrevivente nian oan sira, Diretora dehan, sobrevivente nia oan sira bele tuir no partisipa iha programa bolsu estudu Rejime Hakbiit tanba programa agora la’o hela.
Iha preokupasaun seluk kona-ba kria programa bolsu estudu espesiál ba sobrevivente nia oan sira, Diretóra esplika, hanesan ema tékniku labele foti desizaun, maibé preokupasaun ne’e sei hato’o ba Ministru, karik Ministru tau rejime espesiál ida ba vítima da Guerra nia oan depois sei fó rezultadu.
“Hau agradese ba ita nia kooperasaun, ba tinan ida sei fó oportunidade ba vítima no sobrevivente nia oan sira atu bele kandidata-an no involve-an ba iha bolsu estudu ne’ebé agora la’o hela”, Diretóra agradese Centro Chega!.
Centro Nacional Chega! I.P (Centro Chega!) nu’udar Institutu Públiku ida ne’ebé estabelese ho Dekretu Lei no. 48/2016 no tutela diretamente ba Primeiru-Ministru. Centro Chega! nia vizaun mak: “Sosiedade ida ne’ebé inkluzivu, la repete istória pasadu nian hodi promove direitu no valór umanu”. Centro Chega! nia misaun mak: “Harii sentru póz-konflitu ne’ebé prezerva memória pasadu nian hodi promove direitu no valór umanu no harii parseria Nasionál no Internasionál hodi reforsa rede servisu sira atu implementa rekomendasaun sira husi Relatóriu Finál Comissão de Acolhimento, Verdade e Reconciliação (CAVR)- Chega! no Comissão da Verdade e Amizade (CVA) – Per Memoriam Ad Spem, sira ne’ebé relevante”.